ناس تربح وناس تخسر ... بس اللي دايم ربحان مين ؟؟؟

[alfaris200]

بسم الله الرحمن الرحيم

طبعا زي ما انتوا عارفين ان الكثير من الاعضاء او غيرهم يحققون خسائر تلو الاخرى حتى مع ارتفاع مؤشر السوق وبعض الناس ما شاء الله حققوا شي من الربح والله يزيدهم كمان وكمان ولكن هناك جهة واحدة الرابحة دائما.

كما تعلمون انه من ان بدات الاسهم بالحركة الهائلة من تقريبا ثلاث سنوات والناس كلها هابة في السوق ويقال اذا ضيعت احد دوره عند الشاشة

والحقيقة انه من يوم بدأت هالطفرة والناس بدت تجمع القروش من كل مكان اللي باع ارضه واللي باع بيته اللي حلته واللي اقترض من البنك حلال والا حرام الله ينجينا من عقابه وحطوا فلوسهم وين ؟؟؟ وطبعا فوائد الاقتراض معروفة لمين ؟؟؟

الناس فتحت محافظ وبعظهم اشترك عن طريق الانترنت وطبعا الاشتراك مهوب بلاش وبدأوا يشترون ويبيعون والمنشار على البيع والمشترى وطبعا اللي ربح والحمد لله واللي يالله راس ماله واللي خسران الى الركب وكمان المنشار شغال والمستفيد مين ؟؟؟

بدأت المحافظ تفتح والناس اشتركت وحطت فلوسها وين ؟؟؟ والبيع والمشترى شغال والمنشار شغال كما هو معلوم والمعلومات تاصلهم قبل الناس بل هم جزء من الخبر واذا تبي تعرف هذا الامر قارن ارباحهم من الاسهم السعودية بالصناديق الاخرى من الاسهم الاوروبية او او او وشف الفرق عشان تعرف ان المسألة مهيب ذكاء بل لانهم لاقين الشغله سيبه وفي النهاية المستفيد مين ؟؟؟

هم اصحاب الاموال ولو يبون خلوا المواشي بسعر الراجحي بدون اي سبب الا انهم هم اللي يقدرون يحركون السوق ويالله العب على كيفك واذا وصلت السهم ثلاث نسب بدات الهيئة تصحصح وتسأل وش السالفة مع احترامي للتوقيفات والأسئلة اللي مالها مبرر.

وكل هذا و ؟؟؟ تشترك عندهم ولافيه اي قسم للاستشارات او مجلات دورية تعطي معلومات عن الشركات اقل شي يعطونا شوي من قيمة هالعمولة والا اذا كانت المسألة تنفيذ بس ليش العمولات اللي تصل ملايين في الاسبوع ياخي لو تبي تشتري ارض المكتب يعرض عليك عشرين قطعة ويقعد معك عقب العصر كله ويوريك على الطبيعة وينصح لك اذا ما كان غشاش واحتمال 5% انك تشتري بل فيه كثير يروحون يوسعون صدورهم واذا تم الشراء في السنح سنة يتقاسمون 5000 على عشرة مكاتب

السوأل الذي يجب ان يطرح نفسه لماذا نبقى تحت رحمة البنوك ولماذا لايكون فيه وسطاء متخصصين في بيع وشراء الاسهم ويقدمو خدمات للمشتركين وينصحون لهم ونفتك من السستم داون اذا انهار السوق وقلوب الناس وشقا عمرهم ينهار بين عيونهم ولماذا لايكون هنا جهة اختصاص تغرم البنوك في حالة ما اذا تعطل النظام بسببهم وهذا ابسط حق للمتضرر

على كل حال الله يعينا ويصبرنا ومالك الا خشمك ولو هو عوج

[obaid666]

أخي الكريم
موضوعك جميل جداً وجدير بالنقاش
بس ليتك تغير عنوان الموضوع لأن لأن الرابح والدائم هو الله سبحانه وتعالى
رب العرش العظيم والمتكفل بأرزاق خلقه الضعفاء

[alfaris200]

والله انك صادق ولكن قصدي في الاسهم ولا اعرف كيف اغير في العنوان والا كان اقول في الاسهم بدلا من التعميم

[راعي المساهمات]

الرابح الحقيقي هومن اطاع الله