كم نقول بالمكيرش ؟؟ ابونوير في سوق الأسهم بحائل !!!

[السهم المنخفض]

في ظل وضع السوق العابس اود ان ارسم البسمة على شفاهكم من خلال هذه الحكاية التي قرأتها في منتدى حائل

ابو نوير عقب ماتشاوت رجليه ،، قالوا له : تحط فلوسك ،، وتبيع وتشري وانت حاط رجل على رجل ،، لا وقفة بشمس القيظ ولا ترزز ببرد الشتاء ، لا محكمة ولاكتاب عدل ولا مكاتب عقارية ولا دواير حكومية ،، ولا شرطة ولا ورطة ولا فلان ماسدد ،، وعلان مادفع القسط ،، تبيع وتشري وانت جالس .
مانام هكالليلة ،،وفقع الصبح ،، وراح باع غنمه اللي بجرير الضلع ،، وباع الخرفان اللي حاطهن بحصيدة ابو شما ،، ويوم أضحى راح جلب الددسن ،، وباعه بكلب سرق هله ،، وجمع قروشه ،،وحطهن بالبنك وفتحوا له محفظه ، وبدا يبيع ويشري بالكرعان ،، "ايه بالكرعان "المكيرش" ،، يقول وجه تعرفه ولا وجه تنكره "
باع وشرى ،، يوم راعى أمار الناس تضرب بالألوف وميات الألوف ،، وانكس وبع ذهيب أم نوير ،، وعقبه استلحق ذهيب نوير ،، اللي حاطته عند أمه ،، ويفطن لعشرة الاف حاطهن عند ابو حمود يشتغل بهن معه بالمقاولات ، أمار يروح له وياخذهن منه ،، لقا ابو حمود مصفي ويبي يدخل بالاسهم بعد ،، ويوم أنه أقام له يومين أمار يحرج على بيته اللي بشنق العزيزية من شمال ،، ومن حمد ابو ربك ، ويبيع البويت ،، وينكس يستاجره من اللي شراه ،، ويطلع ويقبل حقه من البنشر اللي بخب الطريفي ،، ويلقا له زبون أفغاني ،،ويتخلص منه بيومه .
ويوم أودع كل القروش ،، ويروح يستاجر له جيب "منتهي بالتمليك " ويقعد يقفي ويقبل على صالة العربي ،، ولا يمر يوم الا هو ياشاري يابايع ،، غير الغتيرة الصفراء بشماغ ،، ولبس له ثوب تترو جديد ،، وشرى لام نوير مكوى ،،وقعد يرزز وجهه بالصالة ،، ويصير تالي الوقت مثل أصقه الكلاب ان نبحن نبح ،، وان تثاوبن نبح يحسبهن ينبحن ،، وان هجن هج .
شرينا ،، شرينا ،،
بعنا ،،بعنا ،،
وما غير يفتخ بيديه ،، ويطقق بسبحته ،، والكرعان نوبن بالعلالي ،، ونوبن بخسيف الهندي ،،
وهو لايسمع راي ولا يبي أحدن يحكي عليه من هالشباب "،،،،،،،،،،،" بزعمه انه تاجر ، وراعي صنف ، وتجارة الغنم هو أبخص به من غيره ،، ويعرف لهن قبل ماتجييبهم امهاتهم ،،
لا دخل سلم ،، ولا طلع لعن وشتم ،، ،، ولا دخل بيته ،، راح لقهوته ،، وتنقح ،، وحط رجل على رجل ،، ودلى يراعي للسقف !!!!!!

للكاتب الديرع4

http://www.*********/vb/showthread.php?t=56564