بعد اعلان الشركة عن خفض تصنيفها .......... قصتي في سوق الماشية :
اتجهت بنعاجي الخمس الى سوق الماشية لبيعها ، فوجدت شخص هلا و رحب بي وقال خل عنك الشريطية والبنقالية وهات نعاجك ابيعهن لك وانت رح نم لاني شغال هنا بالسوق من زمان قلت تم والله ان شكلك رجال والنعم فاتفقنا على ان يبيع النعاج على ان لا يقل سعر الوحدة عن الف ريال لي وما زاد له يعني يبي يطلع لي خمسة الاف والزود له الله يرزقه ما احسده .
المهم مريت عليه بعد المغرب هلا ورحب كالسابق ولا باقي عنده وحده من النعاج ، قلت هاه بشر وش الامور قال ابشرك تمام بعت الاولى بالف والثانية بالف والثالثة بالف و النعجة الرابعة بالف قلت افا يعني ما طلع لك شي بس لا يهمك ما راح اخليك ابي اعطيك عرقك وتعبك ، قال اصبررررر ما كملت لك باقي اللي صار بعت النعجة الخامسة بعشرة الاف قلت ياعمي هاذي هي الخامسة بالشبك موجودة قال اية انا يوم شفت ان مكسبي اكبر من اللي لك قلت بنفسي ما يصير لازم انفعك و اشرك معي و اجيك اروح واشتري النعجة بنفس السعر بعشرة الاف .
قلت له مشكور وما قصرت هات 4 الاف وحمل النعجة بالموتر ، قال ياحبيبي فلوسك الاربعة الاف زدت انا عليهن 6 الاف من مكسبي واشتريت النعجة .
اذا انت تبي تاخذ النعجة ادفع لي قيمتها 10 الاف لي 6 الاف ولك 4 ، قلت طيب هات الاربع ألاف وخل النعجة عندك بعها على السعة قال يا حليلك تعال نحسب الموضوع بعت 4 نعاج كل وحدة بالف والنعجة الخامسة بعتها بـ10 الاف لك 5 الاف ولي 9 الاف ثم اني اشتريت النعجة بـ 10 الاف دفعت 4 الاف من حسابك و 6 الاف من حسابي يعني لي 60% من النعجة ولك 40% ، وباقي لك الف ريال حطيته بالارباح المبقاة وترى ما يضيع عندي شي .
( في جلسة ثانية ابغى اقولكم كيف يجري حساباته المعقدة )
قمت من عنده وقلت ما والله اخليلة ابي اشكيه على شيخ الدبش اللي بالسوق ، رحت يمه وقلت له القصة ما قصر الشيخ جاب الرجال وقال له وش بك على هالمسكين قال والله ابي انفعه بالتجارة لانه شريكي وكان جايب معه واحد مروح مثله وثاني سوداني معه دفتر فقال اني بعت على هذا النعجة ب عشرة ثم رجعت على حوشه واشتريتها منه ب عشرة ، وشف دفتر الراعي السوداني مسجل فيه قيمة بيع النعاج وقيمة مشتراهن ما يدخل شي للحوش ولا يطلع الا وهو مسجله .
شاف شيخ الدبش اورق المروح واعوانه فقال لي رفيقك مضبوط ما قصر معك واشير عليك رح انت وان شاء الله يبيع النعجة بقيمة طيبة ويجيك نصيبك وافي ، قلت يالله مقسوم خير واقنعون غصب بكلامهم فرحت من عندهم .
بعد فترة جاء هالمروح للبيت يبغي فلوس للعلف فعطيته ثم جاء يبغى فلوس لعلاج النعجة وكل شوي وهو ناط لي يبي فلوس للعامل و للحوش تقول مسكنها بالشيراتون المهم تذيهنت وقلت خلني استفيد لو شوي من النعجة وقلت للمروح عطني من حليبها نذوقه قال وش تحسبها نادك والا المراعي حليبها نبيعه ويالله يغطي بعض المصاريف وفيه مصاريف اتدينها على شانكم ، جلست افكر وقلت هذا لعب علي ابي اوريك فيه .... رحت لشيخ الدبش وقلت له هالمروح اشغلنا بالنعجة كل يوم يجيني يبي مصروف لها .. فا تكفى ياشيخ خله يبعها او اخذها انا واصرف عليها باقل من مصاريفه قال الشيخ ما تقدر تاخذها منه لان له 60% فمالك الا اني اقنعة يبيعها . قلت جزاك الله خير ... المهم المروح بدء يحط اعلانات للنعجة بكل مكان حتى بـ cnbc خصص برنامج لها ومن وسع الوجه يجي يبغى فلوس للدعاية حتى اني مرة قلت له لا تصور انت مع النعجة بالاعلانات صورة واحد منكم تكفي ترى ما بينكم فرق قال اعقب يا لحية التيس ، عاد اثرت بي هالكلمة اية هين .
الصراحة طقيت من الموضوع والنعجة صارت سديس وشقا يعني ما تالد ولا فيها حليب والمروح واعوانه نزلوا سعر النعجة لحد 4 ريال و35 هللة يبون يشترون نصيبي بهالسعر بعدها ولا كأن شيء صار... قلت ابي اروح لشيخ الدبش يفكن من هالشراكه وقلت له انا بوجهك خلصني من هالسالفة قال الموضوع بسيط سو مثل غيرك شف لك واحد بع عليه نصيبك وفك عمرك وانا ابي اشوف لك مروح غير ذا تساهم معه وان شاء الله تكسب ، قلت يابن الحلال ما يصير ابتلي مؤمن مع هالاشكال قال الشق اكبر من الرقعه هذا اللي عندي .
ضاق صدري وقمت اتكلم بمنتدى السوق لعل احد يفزع معي لان المروح نشيط والله ان يكمخن لحالي .....تجمع الناس حولي يطالعون فيني وكلهم متلثمين ..... حينها تذكرة قضاء داؤؤد علية السلام وحكمه في خصومة النعاج وقلت في نفسي البلد ليس سوق للماشية ، وأن فيها رجال يقفون مع الحق ضد اباءهم وابنائهم وعشيرتهم ولا تاخذهم في الله لومه لائم ، وان شاء الله اوصل لمن استخلفه الله علينا ولا اظنه يحكم بغير الحق ........ وش رايكم يا اهل الدار؟؟؟؟؟؟
|