ابشركم ألي يبغى العقار ينزل بأسعار قريبه من اسعار زمان أنا عندي الحل وسوف تنزل مباشرة وتحت رغبتك.
انزل وأحسب معي التوفير:
1- نزل من متطلباتك وينزل العقار: بعد بحث ودراسة في العقار والفلل وجدت أن المتطلبات هي التي لها الدور الأكبر في ارتفاع الاسعار أكثر من التضخم، وما وصل اسعار الفلل لهذه الاسعار إلا لانها مبنية حسب مواصفات الزبائن، ولو رجعنا للفلل القديمة وطريقة بنيانها عرفنا ليش أسعار الفلل متضخم.
2- بدل ما ندور أراضي كبيره مساحاتها 500 متر و600 متر وأعلى نرجع لمساحات أول 250 متر إلى 350 متر أو 400 متر بالكثير (وهنا توفير أكثر من نصف تكلفة المنزل). وإذا ما تقدر على سعر المتر 1300 في الشمال رح لجنوب الرياض أو لبن القطعه بحدود 200.000 مهوب لازم تكشخ في الشمال وانت ما عندك قيمة الارض وتقول العقار غالي وتدعي على العقار مثل ألي يبي بانوراما وما معه قيمتها، ممكن تشتري أكسنت ب40000
3- ابن الفله بنفسك وبشكل بسيط وبدون الحاجه لشراء الجاهز تجد نفسك وفرت قيمة أتعاب التاجر العقاري واتعاب التسويق والتي أتوقع ما تقل عن 200 ألف وأتوقع أكثر.
4- حاول تبني بدون ما تاخذ قرض أو على الاقل تجنب القرض العقاري لأنه مكلف جدا وأرباحة توصل لضعف المبلغ، وأبن على مهلك (هنا وفرت نصف القيمة) وممكن تتعاون مع أخوانك أو أقاربك وتتسلف مبلغ معقول وتلتزم بالسداد وتوقف مصاريف زايده مثل سفر وخرابيط مالها داعي. او ممكن تشتري أرض أنت وأحد أخوانك وتتقاسمون الفله كل واحد دور مثلا أو دبلكس.
5- ماله داعي تحط الآتي:
- بدل الرخام (سعر المتر 100 ريال) -- > سيراميك متوسط الجوده 20 ريال للمتر.
-بدل بويات أشكال فلفت وتعتيق وجبس وورق جدران مترها بحدون 20 - بويه سادة ابيض او بيج رول وانت ماشي متره ما يتجاوز 5 ريال وحطه مطفي ارخص بعد.
- بدل تأسيس مكيف مركزي أو سبليت - حط شباك.
- بدل ما تحط جبس وحركات لا تحط شي.
- بدل الثريات حط لمبات قلاويز (سلك وحق تركيب اللمبه) زي شغل أول.
- بيبات سادة بدون نحاس وحركات ولا حطها صاج، ولا تحط باب كهرب.
- ماله داعي مسبح وخساير.
- دورة مياه عادية وغساله ام 50 ريال. وبلاط متواضع.
- عراوي بيبان أم 15 أو 20 ريال وماله داعي تشتري أم 120 ريال.
-مطبغ عادي أبو خمس آالاف وماله داعي تشتري ابو 20 ألف ريال.
- وواجهات عادية وماله داعي حجر المتر 100 ريال أو بروفايل متره 25 ريال.
وغيرها كثير من التبذير ألي ماله داعي، يعني كلنا نبي نزخرف بيوتنا ونبيها آخر طراز ورخيصه ما يجي يا شباب فتحو عيونكم، ما فيه أحد راح يشتغل لك ببلاش، وبكذا الفله راح يكون سعرها من 500 الف إلى 800 الف وش تبون أرخص من كذا بس طبق ألي فوق.
سقوط العقار يعني نقص في هذه الميزات والرجوع إلى المزايا التقليديه والعمليه بدون فن وابداع، ولا يمكن أن ترى الفله رخيصه وجميله وكبيره (قد تنزل قليلا لكن إذا نزلت لنصف القيمة أعرف انها رجعت تقليديه زي أول).
أنت اتخذ قرار من الحين ونزل عقارك بنفسك ولا تحتري احد، والله ما راح احد يعطيك فله بانيها باحسن شي بارده مبرده، إلا إذا ما شراها أحد وقدمت مرره وراحت ميزاتها.
الناس في هالزمن تغيروا ومع النعمة نسو الماضي، نسو أيام الامور السمحه نسو البساطة، نسو كيف الناس كانت تلبس ، وكيف تسافر، الحين كلنا صرنا نسابق التجار على الكشخة والبذخ والسفر واللبس وآخر الاجهزة والارقام المميزة وكل هاذي الامور وبالدين والاقساط.
للأسف ما صرنا نطبق مثل مد رجليك على قدر لحافك. الحين اللحاف بعيد ورجلينا واصله الجيران وما عاد فيه لحاف يغطيها.
الحل في القناعه كنز لا يفني، أقنع بما عند ولا تحسد احد ولا تتمنى أن يخسر فلان وفلان عشان أنت تكسب كيف تبي ربي يوفقك وانت حاسد.
|