للهدم بيـت مجلسـه دوب راعيـه .....اللي على طول الدهر مـا يـرادي
بيت البخيل اللـي كبـار علابيـه ....اللي ما هو حاسب لدرب السـوادي
اللي ما حصل نفعتـه لـو بناخيـه ....ناشي على درب الردى والفسـادي
للهدم بيت صك مـن دون ناصيـه .....صكوه في وجه المسيـر عمـادي
ليا سمع صوت على الباب يدعيـه ....قالت ماهو بالبيـت ياللـي تنـادي
وهو وراهـا مرخـي كـل اذانيـه ..... حتى يروح الضيف كنـه جمـادي
كله يخـاف انـه مسيـر يقهويـه .........عن الجمالـه كـن يحـداه حـادي
وللهدم بيت ما يحـط الشحـم فيـه .......ولا كرمـوا بـه متعبيـن الشـدادي
بيت البخيل اللـي كثـار مواشيـه .......من الشحم ضانـه لهـن اجتـلادي
وللعز بيـت دايـم النـاس تلفيـه ..... نجره على على طول الليالي ينادي
بيت الكريم اللي على العـز بانيـه .....اللي ما صر القرش والرزق بـادي
يفرح ليا جاء الضيف باشر يحييـه .......ترحيبـة تغنيـه عـن كـل زادي
قـدم لـه الفنجـان اشقـر مسويـه ...........يستنظـر اللافيـن علـمٍ وكـادي
وكبش البخيل اللي مربيـه يشريـه .....يشريه لو يغلـى بسـوق المـزادي
ويقدمـه والعـذر طـارف يباريـه ....... ما حط فخـره بالثيـاب الجـدادي
وجاره ليـا حـط الكرامـه يناديـه ........يفرح ليا شافه مـع البـاب بـادي
لو شانت الأيـام تضفـي حسانيـه .......يوم الدهر وبينـه لهـم مستعـادي
لو قيل له فقـران مالبخـل مغنيـه ........ولا ضيّـع الأجـواد رب العبـادي
يالبيض درب الطيب هذي مواريـه .......ان كان تبغـن الرجـال الجيـادي
شومن عن اللي خاطره ما يعشيـه .......لو كان ماله كثـر حـوم الجـرادي
ترى عيالـه مـا تعـدى مواطيـه ..........الساس واحـد والهـداد الهـدادي
ياكود من خال يصلـح الله بناخيـه ........والا فسد مثل ابن جـار المهـادي
والطيب ما كل العرب تشتقي فيـه ......ونو المطر ما عـم كـل البـلادي
والشر له عصبه تثيـره وتحييـه .......وتوزم على الأجواد ضرب الهنادي
يثير راس الشـر مـن لا يلاقيـه ........ منافقـي والا الكـذوب الـربـادي
ولا كل من شـال المهنـد يحنيـه .......ولا كل من طب المدارس ستـادي
ولا كل مـن فتـح عيونـه تقديـه .........ان كان قلبه منعمي مـا استفـادي
والناس كلن عقله اليـوم مرضيـه .......مرضيه لو انه عن الدرب غـادي
|