عاد تصدق اني راعي بر واحب اني اذا رحت للدهناء اول ما اوصل هناك اطلع على اعلى قمة طعس و اطالع الافق كله و اشوف لي افضل نقرة او بين جوين يصيرين مليانات حطب .... هالحين وبعد تورطي بسوق الاسهم و اطلاعي على الترندات الهابطة والمسارات النازلة صرت لمني رحت للبر اخاف اطلع الى قمة الطعس لاني اخاف انه يكون فيه ترند هابط من السافي - رباظة - واغرز به و عاد اتعلق انا والجيب و حلها عاد تعليقة من يسحبك فوق ... مالك الا تنزل مع هالترند و ترجع تأخذ عزم اقوى وتلقى لك مسار هابط ثاني و تتعلق مره ثانية وتقول ليتني ما طلعت من تعليقتي الاولى .....
ما اقول الا الله يجيب المطر و نطلع للبر وما نغرز ابدا ً لانه ما راح يكون هناك ترندات و لا مسارات هابطة الارض كلها رويانة ماء ....
و بها ينعم الله علينا و يزين سوق الاسهم و تزين انفس الناس ...والله انه ضايقن صدري و خلن آكل سمبوسة باقيتن من الفطور ازين لي فمان الله
|