[كريم_كرم]

بسم الله ..

أبو حمد الغالي .. جزاك الله خيراً على خوفك على إخوانك في المنتدى .. نفع الله بك الإسلام والمسلمين ..

بس عندي ملحوظة صغننة ..

الشهاب يطلق على الشمعة اللي زي بتاعت النهاردة فعلاً .. بس لما بتيجي في نهاية مسار صاعد ..

إنما لما بتيجي في نهاية مسار هابط .. يطلق عليها المطرقة المقلوبة .. " Inverted Hammer " ..

وده شكل إيجابي مش سلبي .. ليه ؟؟

لأن إمبارح مثلاً الجلسة نازلة لتحت دون تفاهم .. نازلة بس .. إنما النهاردة ؟؟

النهاردة الجلسة بدأت بفجوة لتحت ناتجة عن خوف الناس من اللي حصل إمبارح ..

لكن الخوف ده خلى الأسعار دخلت مستوى شراء مغري لصيادو الفرص .. فدخلوا اشتروا .. ومش كده بس ..

ده اللي حصل إنهم رفعوا الأسعار جداً ودخلوا في عمق أسعار جلسة إمبارح .. وكمان قربوا من سعر الفتح بتاعها ..

أكيد اللي عمل كده واحد من المتحكمين في السهم ليه .. لأنه كده رسم الشارت .. وقال إن فيه قوة شراء ابتدت تدخل في الورقة ..

طبعاً لما الأسعار طلعت لفوق .. ونتيجة الخوف اللي لسه مسيطر على الناس .. دخل الناس الخايفين بايعين ..

يبقى البياع اللي في السوق بقى أكثر من المشتري .. أو بالأصح .. الكمية المعروضة بقت أكثر من اللي بيشتري (( عاوز )) يشتريها ..

خد بالك من (( عاوز )) يشتريها .. وليه ما قلناش (( قادر )) يشتريها .. لأن قدرته على الشرا كبيرة ..

بس ليه تدفع أكتر .. لما ممكن تدفع أقل ؟؟ ..

فالمشتري ساب السوق يريَّح لتحت تاني .. وقفل قرب سعر الفتح علشان يكوِّن المطرقة المقلوبة .. الإيجابية

السهم كمان وقف على 23.6 % فيبوناتشي اللي دلوقتي تمثل له خط دعم .. للموجة اللي بادئة بعد فجوة 21/22 يناير ..

ومنتهية يوم 21 أغسطس ..

كمان ظهورها بعد شمعة الدوجي بتاعت أول إمبارح والمطرقة بتاعت اليوم اللي قبله له معنى كويس ..

إن الناس اللي في السوق ابتدت تصدق أخيراً إن السوق السعودي ممكن يتجه صعوداً بجد المرة دي .. بدون مقالب ..

لأن دوجي وراها مطرقة مقلوبة معناها إن قوي الشراء ابتدت تتغلب على قوى البيع .. أو على الأقل بقت الفكرة في دماغها ..

المشكلة إن اللي مش مصدق أكثر .. وبالتالي البياع أكبر .. فالمشتري بيقول لك خير وبركة سيبوهم يبيعولنا بالرخيص ..

علشان يرجعوا يشتروا منا بالغالي ..

بس يا سيدي ..

الشارت أهو ..



باين فيه المطرقة المقلوبة ونسب فيبوناتشي ..

على فكرة المطرقة المقلوبة .. يلزمها تأكيد علشان تبقى دلالتها صحيحة ويبقى عندنا يقين إن السوق بيلف ..

التأكيد ده إنّ شمعة السبت بإذن الله تيجي بيضاء .. صاعدة ..

ولو أغلقنا يوم السبت عند 129 ريال .. يبقى السوق كوِّن (( نجمة صباح )) غير مثالية ..

ويبقى صباح الفل ..

قول يا رب