الحمد لله يا اخوان على ما اعطى وعلى ما اخذ ..
اذكروا الله .. وعلى مهلكم بس ..
طيب خلونا نفرض كل الاحتمالات في القيل والقال اللي طالع في المنتديات ..
اذا كانت الحكومه اللي ترش بسابك .. اقول وبالفم المليان كثر الله خير ابو متعب .. اللي عطاناها بهذا السعر .. وهذا دليل واضح على انهم يريدون لنا المزيد من الخير .. بتقولون كيف وحنا طحنا طيحه موجعه .. الله يكافينا الشر ..
بقول لكم ليش .. قالوا لكم استثمروا بشركات العوااااااااايد .. فهمتوا والا لاااااااااا ..
وتعرفون طبعا ويش هي شركات العوايد .. ما فيه داعي نعدها .. امها كلها سابك .. ولكن اللي ما فهم الرساله طاح ورى الخشاش .. يطرد النسب .. لا هو اللي ربح ولا هو اللي خسر .. ومكانك راوح .. الشركات ترتفع وهو كل يوم من سهم في سهم يبي نسبه .. وكل يوم وهو يبيع بخساره .. يطرد سهم ثاني عليه توصيه .. ولا شارت ايجابي .. والا راس وكتفين مقلوبه .. وما شفنا بعدها الا الصراخ وانت ياراعي التوصيه وهقتنا ومصادرك مالها اساس .. وانت ياراعي الشارت ما تفهم ابسط علوم الراس والكتفين ..
لو فكرت يا اخي العزيز تأخذ فلوسك وتبني عماره من كذا عدد من الشقق .. ولو فرضنا اربع شقق .. اجار الشقه بالغالب 20000 ريال يعني 80000 ريال السنه كم تكلفة العماره .. لا تقل عن 800000 ريال في هالوقت مع ارتفاع اسعار المواد .. يعني لو خذت هالفلوس وحطيتها بسابك كأنك بنيت هالعماره بضغطة زر على الكيبورد .. وانتظر من توزيع الارباح .. اللي الله كاتبه لك وماعليك من سعر سابك طار والا نزل واكيد بتكون اكثر سنويا من دخل العماره او حواليه.. اعتبرها عماره يمكن تخسر ببيعها والا تربح والغالب لو كنت مستثمر انك بتربح باذن الله ..
يعني بالعربي اللي ناوي يبني هالايام يريح راسه من وجع العمال ويطب باللي في يده بسابك .. ولاعاد يفتح المحفظه الا بعد اربع سنين .. ويذكر هالكلمات اللي قلتها له وان بغى يجي ويقول مشكور والا تراني متنازل ..<< مهم التنازل :dinmt:
طيب نروح لفرضية ناس شاريه اسهمها بسعر الاكتتاب .. وانها ربحانه بالطول والا بالعرض .. اقول كثر الله خيرهم.. ناس كرماء وحنا نستاهل .. اجاويد وابناء اجاويد . ولاني من ينكر المعروف .. اللي نزلوا اسعارهم لنا وعطوناها بهذا السعر عزالله عيال حموله .. وليه اساءة الظن .. تهقون واحد خسيس اكرمكم الله ..لا اصل ولا فصل ولا دين ..يقدر على هالفعل ويعطي اسهمه للناس بسعر التراب على شان يستثمرون فيها طول الزمن .. اقول حدثونا بما يليق .. وخل عنكم سفاهة عقولنا ..ترى اللي ينزل السوق .. ما ينزل الاسعار بهذا الشكل الا حب فيكم .. وحب في مصلحتكم ..بس انتوا ناظروها زين واحسبوها زين .. والله ما اظن يبيعكم بهذا السعر الرخيص الا واحد يتمنى لكم كل خير .. ثم سؤال هل من احد بغى يشتري سابك بهذا السعر وقالوا له ممنوع شراء سابك .. يا اخي بيع الاسهم الخسرانه وريح دماغك وطب في الخير اللي الله مرسله لك .. والله انه باب رزق وانفتح ..
واذكركم في يوم من الايام كتبت الاخت ( اخت رجال ) على هذا الرابط
http://www.tdwl.net/vb/showthread.php?t=211297
ورديت عليها الرد رقم 20 وقلت ليت الحكومه تتنازل عن جزء من ارباح الاسهم اللي تملكها في سابك لصالح الاسهم المتداوله .. لكي ترفع من العوائد على السهم تشجيعا للاستثمار .. والحمد لله على كل شيء .. سعر سابك نزل بما يكفي ان نحمد الله ان اشتريناها بهذا السعر .. فإن كانت الحكومه فلها جزيل الشكر وهذه اكبر منحه من الدوله طب واغرف على قدر ما تستطيع ..على قولة الاخ الالف ..اكحش بما ملكت يمينك .. .. اذا كنت متعلق في شركه خشاش فقد آن الاوان ان تودع الخشاش .. وتكون مستثمر وتبني عمايرك وانت جالس بكرسيك .. اشتر يا اخي واستثمر ولا تنظر الى السعر حتى لو وصل ريال .. وكلما نزل السعر وانت عندك سيوله اشتر في سابك .. او الراجحي .. انت ليه زعلان من نزول السعر ..قول كثر الله خير من عطانا... وافهم النزول على وجهه الصحيح .. ولا يغرك من يقول للنزول بقيه .. النزول نزول الخشاش اللي يتحسر عليه طالبي الربح السريع .. والله يالمستثمرين واللي يفكرون بعقل في سوق الاسهم انهم في غاية السعاده من هذا النزول .. اكحششششش ولا يهمك المرجفين .. ترى الفرص تجي مره .. وان كان للفرصه بقيه ..خذ في سابك .. وقل هل من مزيد لهذا النزول ودي اكحش بعد ... ولا تناظر لقيمته لو وصل ريال ..
اذا انتهيت من الكحش ايها الكاحش .. فلا تنسى اغلاق المحفظه ...
فرص الاستثمار آن اوانها ..
تحيتي لكم