حدثنا أبي جهاد عن أبيه عن جده قال :
مرت بنا أيام وليال نأكل النسبة بعد النسبة ونجد العيشة في بيشة ونخرج الدواء من الكهرباء ، حتى جائنا أمر الله وأغار علينا ( الزير جماز ) وأصبحت المصافي بصاع من شعير وسابك لا تقبل الماركت ... ثم فاضت عيناه بالدمع وقال : لم أجدمن تركة جدي غير هاتين { وأشار بإصبعيه على شاتين بألف سهم من المواشي } إنتهى .
يا أخوان للآن لم أشاهد أي من كتاب المنتديات ينادي بالخروج من السوق ، بل الجميع ينادي وكالعادة وأشدد على كلمة كالعادة ( لا للبيع ) وسترتفع قيمة أسهمكم ، وتمسكوا و و و و إلخ .
طيب ممكن بس أحد يقولي وش الفكر الإقتصادي في إني أعلق نفسي بأسعار كلنا نعرف أنها فوووووووووووق فوق العادة ؟؟؟؟ على أمل ( والله ما نكبنا الا أمل وأخواتها ) أن الأسعار ترتد !!!!! ومتى بترتد ؟؟؟ الله أعلم .
يعني أصير متعلق ومنتظر رحمة ربي ثم مزاج الهوامير ومتى يوصلون بالسهم للسعر اللي أنا مشتري فيه ،، وتصير حياتي كوابيس بالليل وهم وحزن بالنهار من وراء هالسهم .
يا جماعة بأقولكم على معلومة تاريخية لوجه الله تعالى ترى عمري من دخلت السوق من حوالي خمس سنين ما شفت قوة إنهيار مثل اللي نشوفه الآن ولا عمري أصلاً شفت إرتداد سريع للسوق من بعد الإنهيار الا بطلوع الروح فما بالك والوضع اللي نشوفه أصعب من أي إنهيار مر في الخمس سنين الماضية !!!!!!
طيب وإذا مسكت سهم مثل بيشة الزراعية بسعر 2300 مثلاً وأنا أصلاً عارف أنه في 2003 كان بسعر 16 ريال ويحرجون عليه بنسبة تذبذب 20% ولا أحد يشتريه وش أصير وقتها ؟؟؟ أصير مغامر برزقي ورزق عيالي وأسمحولي على التعبير أشوف سوق الخردة أصرف لي من سوق الأسهم . ( ولا يطلع اللي يقولي معطيات السوق غير والخرابيط اللي لا تودي ولا تجيب ولا وين معطيات السوق عن الجبس والدوائية والغاز ... إلخ من الأسهم القوية ) ، وقيس على بيشة باقي أسهم الخشاش والفشاش إللي يا كثرها .
إللي أقصده يا أخوان لا نصير مثل جد أبي جهاد المذكور أعلاه ونتعلق تعليقة عمر ويمكن دهر . خلينا نميز أسهمنا ونشوف إن كانت تستحق الصبر عليها ولا ندفها بسعر سوق ونفتك ويعوضنا ربنا بخير وننتظر القاع وندخل وأي إرتفاع وقتها هو ربح لنا ( وأعتبر خسارتك من الأرباح اللي حققتها طوال الفترة الماضية ) ،، ولا إن أذن رب العباد وأرتد السهم من القاع اللي نسمع عنه ولا نشوفه أشتريه بسعر أقل من سعر بيعك ( هذا لو كنت ميت على سهمك ) وأرضى بالرزق المقسوم .
أدعو الله سبحانه وتعالى أن ما يخسر مسلم بس المثل يقول ( يا مدور المكاسب رأس مالك لا يضيع )
شوف سهمك وأنت أدرى به هو خشاش ولا ... وأتخذ قرارك وترى السوق مفتوح بكره وبعده والسنة الجاية واللي ضاع منك اليوم تعوضه بمشيئة الله تعالى في الأيام الجاية .
هذي نصيحة أخ مجرب للتعليقات وسماع كلمة لا تبيع وأصبر وشيل عرضك والسهم بيرتفع ( إلا على فكرة من اللي قاعد يعرض أجل ؟؟ ) .
وتحياتي للجميع .