[محقق المكاسب]

تبسيط مفهوم الاسهم (الجزء الثاني )



طيب وصلنا لسوق الاسهم او البورصة, وهذا اختراع مفيد, يقول لك اول الناس كانو يعرضون اسهمهم بالجرايد, اللي يبي يشتري يتصل, الحين صارت عن طريق البورصة او سوق الاسهم او صالة اسهم البنوك ... مكان يتجمعون فيه الناس قدامهم شاشة احيانا كبيرة تعرض سعر حي لاسهم السوق, مع التغيرات اللي صايرة وكل شي ... بحيث ان كل شي قدامك ... وعن طريق هالقائمة تشوف سعر السهم كم صار, والسعر اللي تبي تبيع به, او تشتري به ...

طيب انا الحين عندي مبلغ صغنون, فزت فيه بجريدة الشرق الاوسط, ممكن اشتري به سيارة, ممكن استثمره بالعقار (ياحبي للعقارات مع اني ماعمري شريت ارض بحياتي ولا عمري شريت سهم ابد) وممكن افتح لي مشيريع, وممكن ادخل بالاسهم ...

اها الاسهم, وش معنى؟ عشان تبيع وتشتري فيه ... تشتري بسعر رخيص وتبيغ بسعر اغلى وكذا انت الربحان ...

طيب وش يخلي الناس يتداولون الاسهم؟ من قصة السيفوي حقنا شفنا ان الارباح السنوية هي المحرك الرئيسي لسعر السهم وهي اللي تلعب بالسهم وهي اللي تخليه مطلوب او مكروه ...
طيب بس الارباح ماتجي كل يوم, تجي سنويا, ليه الناس يبيعون ويشترون على مدار السنة؟ بصراحة مدري ... مع احترامي انا احس ان هالعملية غباء لكن الفوزان ممكن يفيدكم بهالشي ...

طيب دام ان الارباح تجي سنوية, ليش الاسعار تتغير على مدار الدقيقة؟

والله فيه عوامل كثير, لكن لو نتكلم عن السوق الامريكية, كل شي يأثر, المستوى المعيشي للفرد, القوى الشرائية للعملة, اسعار النفط, الارباح, اخبار اندماج الشركات, افلاس الشركات, ارباح الشركات, واشياء كثير ...

هالعوامل هذي كلها تتجمع وتنتج مايسمى العرض والطلب, اما يكون العرض اكبر من الطلب وينزل سعر السهم او يكون الطلب اكبر من العرض ويرتفع سعر السهم ...

كيف يعني؟

يعني كمية اسهم السيفوي حقنا المعروضة للبيع تساوي 1000 سهم, بينما الناس مايبون الا 500 سهم, كذا العرض اكبر ولازم سعر السهم ينزل ...

او العكس صحيح, المطلوب 1000 والمعروض 500 وكذا يرتفع سعر السهم ...

عملية طبيعية, غرق السوق بسيارات, ينزل سعر السيارة لان محد يشتري من كثرها, بس قلل الكمية وتشوف ان سعرها يرتفع ...

طيب فيه ناس يبيعون ويشترون خلال ثاني, وفيه خلال شهر وفيه وفيه ...

هنا يجي انواع المضاربين, فيه ناس يضاربون بشكل يومي, يعني يدور ربح بشكل يومي بس, وهذا مضارب المدى القصير, يدور الربح وبس حتى لو كان صغير, وهذا اخطر نوع, بس افضل نوع

ملاحظة: كل مازادت نسبة المخاطرة في اي مشروع, كل مازادت نسبة الربح

ليه اخطر نوع؟ لان ممكن سعر السهم ينزل خلال نص ساعة, ويروح فيها, فا لازم يبيع
طيب ليه ما اصبر الى بكرا او بعده؟ يمكن يرتفع؟
اذا كذا اجل ماصرت مضارب يومي, لان من مزايا المضارب اليومي انو لما يقفل السوق يكون مصفي كل شي, ومايخلي شي عنده, سواء بربح او خسارة ...

نوع ثاني هو نوع مضاربين المدى الطويل, وهذول راعين تكتكة وحركات, ودراسات وقصة وقلق, بس ممكن تكون الارباح اللي تجيك شي, يشتري ويخليه لما يضرب ضربته بعد فترة ...

مثال حي وواقعي:

خل ناخذ سهم المكيرش (اغرب سهم بالوجود)

قبل اسبوع تقريبا كان سعره حوالي مية ريال, لما طاح السوق بالايام اللي فاتت نزل سعره ووصل 86 ريال, وارتفع بعدها الى 89 ريال, خلال يوم او يومين ... المضارب اليومي ربحه من هالعملية ريال او ريالين لكل سهم ...

قبل امس ارتفع السهم ووصل 101 ريال, يعني لو انك شاري ب 86 ريال, صار ربحك 15 ريال لكل سهم ...

المضارب اليومي يقنع بريال او ريالين, بس مضارب المدى الطويل لا ما يقنع ...

والزبدة؟ ابي ادخل بسوق الاسهم!

ماهي بالسهولة اللي متصورها, وجع راس, ولازم متابعة يومية ودقيقة, ولازم تسوي دراسات وتحليلات عشان تضبط امورك ... على الاقل رح شف لك واحد مضارب يجلس بحدا هالصالات اجلس معه بشكل يومي وشف وش يسوي ... واقعد اسال نفسك ليه شرى, ليه باع, ليه وليه وليه ...

بعدها فكر ...

طيب ابي ادخل, كيف؟ والله بكيفك بس ما انصحك تسويها منا والطريق ...

عموما, فرضا حسابك ببنك الرياض, تروح للبنك, وتروح لخدمة العملاء, وتقول لهم ابي افتح محفظة ...

وشي هالمحفظة؟ محفظة تحط فيها فلوسك بحيث لا بغيت تبيع وتشتري الفلوس تدخل وتطلع منها ...

خلاص تطلب منهم المحفظة ويربطونها بحسابك, بحيث تقدر تحول اي مبلغ من حسابك الى المحفظة ...

اتوقع ان هالعملية تاخذ من اسبوع الى عشر ايام اذا ماني غلطان ...

اذا فتحوها لك وكل شي, تحول المبلغ اللي تبيه للمحفظة, بعدين تروح عاد تسوي الدراسات وتشوف اي شركة او شركات تبي تشتري اسهمها ...

اذا اقتنعت تروح للموظف حق البنك وتطلب منه ينفذ عملية شراء بالسعر المعروض حاليا, وبس ...

كانك داخل على وجهك, فا تنتظر ضربة حظ لما يرتع وتبيع, وكانك داخل على اصول, عاد تكون عارف متى تبيع ...