شركة الرصاصيه ...رصاصه إغتالت أحلام اطفالي

[هاني البدر]

موقع الاغتيال: الرياض – سوق المعيـقـلـية
عدد الضحايا: خمسة(أب ،أم ،ثـلاثة اطـفـال)
الحـلـم:أمتلاك شقة

الباب يطرق:يُفتح الباب ..فاذا بصاحب (العمارة).
ألمالك:السلام عليكم يبوخالد
المستأجر (ابو خالد):وعليكم السلام..هلا حياك الله تفضل
المالك:لاوالله انا مستعجل بس أنا كنت قريب من المنطقة وقلت امر اسلم واشوف الأيجارتراك تأخرت شوي علينا يبو خالد.
المستاجر:آآآآآآه تنهيده تنفجر من قلب ابوخــالد،...والله انك صادق وأعذرني على التاخير لكن مثلك عارف مرت علينا بعض المناسبات وسببت لنا ضغط شوي لكن ربك يدبرها ...أمهلني يومين او ثلاثة.

.................................................. .......................................
دخل ابو خالدالى شقته وهو لايعرف كيف يدبر أمر الأيجار وكأن الدنيا ضاقت بوجهه.
أم خـالد:من اللي عند الباب يابوخـالد؟؟
ابوخالدبحسره:مالك العمارة ...وهو يسند رأسه عللى الحائط بحيرة شديدة.
ام خـالد:ياااالله متى ربي بيتوب علينا من طرق باب المالك كل سته اشهر
ابوخـالد:ربك يفرجها.

بابا....بابا..
ابوخالد:نعم حبيبي
خالد:متىتشتري لي بلاي ستيشن زي عيال خالتي؟
ابوخالد:إن شاء الله ياحبيبي بعدين الشهر الجاي
خالدالصغير:يوووه كل يوم ....كل يوم تقولي بعدين والشهر الجاي وأنت تكذب علي.

ريم الصغيره:بابا...بابا..اشترلي تكفى الله يعافيك عروسه(فُله).

تركي الصغيروهو الاصغرفيهم:وانا...واناأبغى سيكل يولع نور ويضرب بوري زي سيارةالشرطه،،،،وكأنه في سباق مع اخوته من يطلب أولاً.....يحصل على لعبته.

ابوخالد:في نظرة خاطفه لزوجته ملؤها الحزن على عدم أستطاعته بتلبيه رغبات اطفاله؟
ابو خالد:حبايبي ...احنا محتاجين فلوس علشان نعطي راعي البيت حقه.
خالد:ليش تعطيه فلوس؟
ابوخالد:علشان هذا البيت بيته واحنا ساكنين في بيته ولازم نعطيه فلوس.
خالد:وليه انت ماعندك بيت مثله؟؟
وكأن خالدفتح للأب أفاق جديدة في التفكير ...
الأب:......نعم ليه ما يكون عندي بيت وبدأ يطلق لمخيلته العنان في امتلاك شقة تكون ملكه ولاطفاله من بعده.

ابوخالد:الو....الو...ابو سعد كيف الحال؟
ابوسعد:هلا ابو خالد!
ابوخالد:ابوسعدأبغى اقابلك.
ابوسعد:أبشر وين تبي...تتفضل عندي او اتفضل عندك في البيت.
ابوخالد:خلنا نتقابل في الاستراحه وعيد عن الازعاج.
ابوسعد:سم ابشر...أجل موعدنا بعد صلاة العشاء اليوم.

.................................................. ..................................................
تقابل الاثنين وأخذ ابو خالد يشكي بعد الله لابوسعد الحال وعن احلامه في أمتلاك شقه.

[هاني البدر]

ابو سعد:عندي الحل....يابوخالد.....ورا ما تحاول تدبر عمرك وتجمع لك كم قرش وتأخذ قرض اسلامي من البنك وهو حلال ان شاء الله وبعدين تساهم بها في هالشركات المساهمة ومايمرخمس او ست سنين إلاوأنت مسدد القرض ويكون عندك مبلغ زين تقدر تشتري لك به شقه تمليك.
ابو خالد....وكأن بوادر الأمل أنفتحت له من جديد......تكفى على يدك.
ابوسعد:رح البنك وشف كم بيعطونك على راتبك وحاول تزيدها واذاخلصت اتصل عليّ

بكل حماس توجه ابو خالد للبيت ودخل مسرعاً....وقابلته زوجته وطلب منها عقد اجتماع طارئ
ومغلق......أستغربت زوجته من هذا الحماس !!....وكأن بارقه أمل تلوح في الأفق.

ام خالد::سم يابوخالد....عسى خير...
ابوخالد:اجلسي.....شوفي انا قررت اعمل حد لمشكله الايجار....ولكن المسأله ماهي سهله
قررت آخذ قرض من البنك وهو بطريقة شرعيه ......بيع سيارات وكذا......وبقيمتها مع بيع سيارتي مع شويه تضحيه من عندك ....وصبر....وشويه تـقـشـف راح نحقق هدفنا بأذن الله.
ام خالد:تضحية من عندي؟!!وش اللي اقدر اسويه؟انا معاك على الحلوه والمره.
ابوخالد:يعني...وهو خجلان ....اذا كان فيه كم قطعه ذهب وإلاشي.....
أم خالد:كم قطعه ذهب؟؟ياحسرة اللي عندي طقم ما يسوى الا الفين ريال وعساه يجيبها بعد.
ابوخالد:مومشكله ينفع ...يد على يد تساعد...وانابروح بكره أبيع سيارتي النص عمر...وأشتري سيارة ربع عمر(تمشي الحال)ونتعبر بها الين الله يفرجها.
ام خالد:يفداك الطقم يابوخالد وطقوم الدنيا كلها.....أصلاًالموضه هالايام هي الاكسسوارات وهو على الذمه

.................................................. ..................................................
في تسابق مع الزمن باع ابو خالد طقم زوجته وسيارته سعياًوراء الحلم الجديد...كما اكمل أوراق طلب القرض وفي انتظار المواااافقة.

الو....فلان موجود......معك فلان(ابو خالد)...
معك البنك(......) طلبك تمت الموافقه عليه يا سيد (.......)

.................................................. ..........................................
طار ابو خالد من الفرحه.....(وكان موظف البنك قد بلغه بانه فاز بمليون ريال).....من شدة الفرحه وهويصرخ...وافقوا...وافقوا...وراح نشتري البيت ياعيال.......ياام خالد...

تجمع الاطفال والام حول الأب في ذهول من رقصات الاب وقفزاته وفي استغراب شديد.
التفت ابوخالد ناحية اطفاله وزوجته وقال:اخيراًراح نشتري لنا بيت.
ارتسمت البسمه على محيا الاطفال وهم لازالولم يستوعبوافرحه ابيهم ولكن المهم لديهم أنهم سوف يكون لهم بيت
وأخذو يقفزون من الفرحه ويصرخون ويتراكضون خلف بعضهم ويرددون....
ايه...ايه....بنشتري بيت وكأنهم سوف ينتقلون اليه غداً...ولم يعلموأنها(خطة خمسية)واذا صح التعبيربعد 6سنوات.
.................................................. .................................................. ...
تم أجراءات البيع الشرعيه مع البنك وما بقي الا تحقيق الحلم،،،،،
ابوخالد:الو.....ابو سعد.....ترى سويت اللي قلت لي عليه وطلعت القرض والان نبي همتك يابطل
ابوسعد:حلو ...حلو....تمام اجل موعدنا في الاستراحه علشان ننسق الخطوة الجاية.
ابوخالد :تكفى لا تتأخر.
ابوسعد:هاه ...هاه......مستعجل؟
ابو خالد:فوق ما تتصورابغى انتهي من هذا اللهم.
ابو سعد:طيب ...

[هاني البدر]

اجتمع الاثنان واخذ ابوسعد يحدث ابو خالدعن تلك الشركة المساهمة والتي انشطتها في بيع العطوروعن انها شركة موثوق فيها....ولكن ارباحها بسيطة.
ابوخالد لم يسأل ولم يناقش ولم يدخل في التفاصيل وكأنه في سباق مع الزمن...وكأنه يريد ان يرى حلمه وحلم اطفاله يدخل حيز التنفيذ ولم يعلم ماذا خبئ له الدهر.

أتفق الاثنان على الذهاب الى مقر الشركه(مقر الاغتيال)يوم غداً.
دخلو بعد تنسيق من شخص موصي عليهم الى صاحب الشركه والذي كان يتستربشكل التقى والطهروالذي بدوره ارسلهم الى المسئول عن قبول المساهمات وأخذ هذا المسئول يفرش الارض من حرير ويرسم لهم صور الثراء والنعيم المقبل عليهم من جراء دخولهم في هذه المصيدة......عفواًهذه المساهمة
بدون تردد اتفق ابوخالد مع المسئول على ادخال المبلغ(تحويشه العمرواقساط لمدة6 سنوات) الى حساب صاحب الشركة غدا صباحاً.....وبالفعل تم التحويل...
وبداء مشوارجديد في احلام هذه الاسره،،،،
أين سوف نشتري الشقه؟
كم غرفه نحتاج؟ وغيره
ام خالد:لازم نعمل حسابنا ان الاولادراح يكبرون وراح نحتاج لغرف زيادة وأنت عارف يابو خالد ريم حتكبرولازم تكون لها غرفة لوحدها مو مثل وضعنا الان حاشرينهم في غرفه كلهم تقول سمك سردين.
الاطفال:بابا.....انا ابغى غرفه لوحدي.........وأنا يا...بابا بعد أبغى اكون لوحدي .....ليش خالد له غرفه لوحده
وأنا يا بابا....ابغى اكون معكم لأني أخاف.

أحلام ورديه بريئه......جل هم هذه الأسرة هي امتلاك شقة....ليست فيلا او قصراً
وضع التقويم على الحائط وبداء العد التنازلي ومع كل ورقة تنزع من التقويم ترتفع نسبه الامل ويقترب تحقيق الحلم.....جهود تضافرت....تضحيه من الاب والزوجه .....تقشف ليس له مثيل.
حتى الاطفال لم يعد يسألون عن البلاي ستيشن...او عروسه فُله اوغيرها من الالعاب.،،،بل وضعت حصاله لجمع النقود......بادرة من الاطفال بتشجيع من الام لمساعدة الاب في شراءالشقة.
حلم بري .....حلم طفوله....الكل يخطط ماذا سوف يكون لون الغرف والمجالس....وغيرهاالكثير.

بعد مرور سنــه و8أشهر
جرس الهاتف يرن،،،،
ابوسعد:ابوخالدسمعت اللي انا سمعته
ابوخالد:خير إن شاء الله...وش فيه؟
ابوسعد:يقولون ان شركة الرصاصيه طلعت مثل الشركات الوهميه اللي نسمع عنها وإن منصور الحسين صاحبها طلع (نصاب).

تسارعت دقات قلب ابوخالد حتى كادت ان تقف.......لم ينطق بكلمه....
ابوسعد:الو....الو....ابوخالد!!!!
انعقد اللسان....وهو يسأل نفسه.....مو معقول ......مو صحيح.....مستحيل .......اكيد فيه غلط.
وش اقول لاطفالي؟؟؟
أقفل الخط دون ان يرد ولو بكلمه واحدةلصاحبه من هول الصدمه.
التفت الى زوجته وهي غارقة في احلامها...كيف تؤثث هذه الشقه وماذا سوف تعمل بها.
أم خالد............المساهمة طارت.

ام خالد:كيف وعلامات الدهشه في وجهها.........كيف يعني طارت........وشلون....وهي تنظر الى زوجها وقد تزاحمت الدموع في مقلتيها.
أنفجرت ام خالد باكيه........
ابوخالد.....رد علي ......حلمي .....حلمنا كلنا.......مستقبل اطفالنا......
بهذه السهوله يطير ....من اللي قالك الخبر...تأكدالله يرحم والديك
لاتخليني كذا.......ليه ساكت......رد علي........كلمني.......ليه كذا.....حرام....والله حرام....مستقبلنا انتهى
ليــه......هو ناقص ثراء.....ناقص فلوس يوم يسرقنى.......هذولا ...ما يخافون الله.