أنا والمضاربة في الاسهم في البحرين(قصة)

[خيالي]

أنا من اصحاب الطفره والمعاش الردي( تف ماشاء الله لاانظل نفسي) ، أملك دريهمات ورغبت في تنميتها
جلست ليلة في استراحة المنتهي ابو نايف وسمعت الشباب يتكلمون عن سوق البحرين للأوراق المالية وانه بامكانك المضاربة على الاسهم وان صابت معك تبنك بضربة كيبورد
قررت أنا يا واحد مقلع أشد الرحال للمنامة وعندما كنت أجهز بقشة السفر سألني عبدالله أخوي وين بتروح مالك عادة تاخذ بقشة معك وشنطة المعاميل
مـقـلـع : بازرق قريب ولاتقول لامي لأني بروح للبحرين
عبدالله: خذني معك ولا بعلم امي
مـقـلـع : قسم بالله لا افقع وجهك يالسرسري
عبدالله: طيب رح مانيب معلمها بس وش تجيب لي معك
مـقـلـع : يقولون فيه بالبحرين خيزرانن منقعة بماء بحر طالعتن تسلع سع
عبدالله: الا جب لي معك حلوى شويطر به طلاب يجيبونها بالفسحة وادلع عندها الا شفتها
مـقـلـع : على خير بس من نشدك عن قل قانص مع عبود الدلخ وبدر المحقان
عبدالله: ماخبرت مقناص بالقيظ خبري بالشتاء
مـقـلـع : ماشفت احد يقنص ضبان وجرابيع يمال الصلاح
عبدالله: طيب بالسلامه اجل

مشهد اول

يدخل الـمـقـلـع ***** جسر الملك فهد ويقف عند الشباك
مـقـلـع : السلام عليكم
الموظف: عليكم
مـقـلـع : كمل سلامك الله يجزاك خير
الموظف: وراك سرا هات 20 ريال
مـقـلـع : ليه عشرين انا بس واصل قريب وراجع
الموظف: لاتعطلنا كثير يقولون مثلك
مـقـلـع : طيب لا تنفخ يا حــلــو
الموظف: هات 20 خلصنا
مـقـلـع : ورا نفسك خايسه
رفع المـقـلـع نفسه مع جهه ودخل يده بمخاة الجنب يدور المحفظه مالقاها
ورفع الجهة الثانية ودخل يده بالمخباه الثانيه مالقاها و دخل يده بجيب
مخباة الصدر ولقى عشرين جديده وتحسف فيها وجلس يدور على وحده
قديمه ولقا امهات ريال مصرورة ويعطيه عشرين منها و يوم أقفا ألتفت
يمه وقال : أنقلع بس أنت وسلامك اللي مثل وجهك وهو يحط الهايلكس بواحد يهج


مشهد ثاني

المـقـلـع في شارع الشيخ خليفه المتفرع من شارع الشيخ عيسى والوقت
الساعه الواحدة ظهر ومطلع يده مع الشباك وهو يمسح من العرق ويتمتم
وش هالديره اللي ترشخ مياه اجل ذي الرطوبه اللي يقولون ياحليل صحاصح نجد وهبايبها
على جانب الطريق سيارة فولكس واجن سوداء متعطلة ويهدي السرعة
المـقـلـع من جنبها ويشوف صبية تجلس خلف الدريقسون وكفر سياراتها
الخلفي مبنشر فيتوقف المـقـلـع لمساعدتها
مـقـلـع : السلام عليكم يالاخت
البنت: اهلين ويقول في نفسه ذا رد السلام اهلين ماعليه نمشيها
مـقـلـع : محتاجه مساعدة تراي فاضي ماوراي شغل
البنت: التاير بنجشر
مـقـلـع : وينه وشو
البنت تنزل من السيارة ويشاهد الـمـقـلـع طولها الفارع وقدها المياس
ويتحسر على رداة حظه اللي اول مرة يسافر قبل تنتهي صلاحية جواز السفر
مـقـلـع : وين العفريته
البنت: شنو عفريته بسم الله.... ههههههه تبي الجيك
مـقـلـع : جيك اسمه عفريته امحق عرب ...... وينه
البنت: في الدبه وتمد يدها لزر فتح شنطة السيارة
ويقول الـمـقـلـع في نفسه هذي الدبه الدبه والله اللي انا خابر
يصلح الـمـقـلـع السيارة
البنت: الشكر يالاخو وتمد يدها بالكرت ويخطف المـقـلـع يدها يحسبها تسلم وترتبك البنت
مـقـلـع: ماشاء الله اسمك نجلاء
نجلاء: نقول نيلاء بالبحرين
مـقـلـع: اسمي مـقـلـع مشرف منتديات بالنت
نجلاء: انا موظفة بسوق الاوراق المالية
مـقـلـع: حظي زين اجل انا شاخط من السعودية ناهج يمكم والله جابك من قريب
نجلاء: وش شاخط وناهج
مـقـلـع: ماعليك ذا هرج تعرفينه بعدين واسم عائلتك (؟؟؟؟) الله حييهم من وين انتم
نجلاء: من البحرين بس عجميه
مـقـلـع: زيييين من جماعة راكان بن حثيلين
نجلاء: وشو راكان انا عجمية من العجم من ايران اصلنا يعني
مـقـلـع: اييه إيه أجل من جماعة علي دائي حق المنتخب ا
نجلاء: الوقت هالحين بريك بالسوق وانا طالعة اتغداء بالسيف وراده
مـقـلـع: بريك اجل يقرب لسعد بريك ( يقالي انكت) افهم انك تعزميني
نجلاء: حياك ونكمل سوالفنا عن راكان بالمطعم



مشهد ثالث

يدخلون مواقف السييف مول بعدما وقف الـمـقـلـع الهايلكس وحط شنطة الزهاب والمعاميل بمرتبة وراء وقفل السيارة ويقترب من نجلاء
مـقـلـع: وين رايحيين السوق به ناس واخاف يشوفوني بنات المنتدى وإلا
الماسنجراللي مايفارقون السوق وتطلع اشاعات
نجلاء: وشو لك صديقات بعد؟
مـقـلـع: مالت أي صديقات وانا اللي مافي ماسنجري الا خناشير وتماسيح
نجلاء: نتغداء هنا ونكمل نروح للسوق زتات
مـقـلـع: زتات يعني بسرعه صح
نجلاء: صج صرت تفهم علي
مـقـلـع: اجل اجلسي على طاولة واجي انا امشي واسوي نفسي اسئل عن شي واسلم عليك وتعزميني واجلس
نجلاء: ههههههههه افتهمت تخاف من الناس هههههههه وش مسوي أنت
مـقـلـع: ان صوروني اهل الجوالات بكميرات تشوفيني بكرة مشرشح في النت وخصوصا من العلة دحيم ابو راس
نجلاء: تقول اسماء ماعرفها
مـقـلـع: اصبري علي واشرح لك..... يالله اشوفك على الطاولة
يجلس الـمـقـلـع على الطاولة اللي سبقته نجلاء اليها وهو يتلفت
نجلاء: وش فيك انت مسوي غلط
مـقـلـع: بلاك ماتدرين لو يشوفني احد من اللي مسنتررين بالسيف وإلا أحد من جماعتي كان فضايح
نجلاء: حنا بمكان عام على فكره انت شنو يدلعونك
مـقـلـع: مـقـلـع واسم الدلع قــلــوعــي
نجلاء: تشرفنا.... وش تشرب طيب
مـقـلـع: ما أحل الله
نجلاء: ههههههه ماهنا الا اكل حلال وين حنا ببار
مـقـلـع: يقولون اهل السوالف من يروح للبحرين بس يقعد و تحمر عيونه
نجلاء: ههههههه لا الناس تجي للبحرين تتمشى وتتسوق وتشوف سينما
مـقـلـع: ذكرتيني ابي ادخل سينما واصور فيها للذكرى وابي اقهرعبودي الدلخ ومحقان افندي حقين المنتدى
نجلاء: مدري شنو كلامك بس شنو تشرب
مـقـلـع: على كبدي قداد القهوة وانا بالطريق طاحلن لي دلة قهوة مسويها جنب المحطة وانا ابرد الهايلكس
نجلاء: إن زين
مـقـلـع: وش هالكلمه الزينه عوديها
نجلاء: ان زين يعني طيب
طلبوا الغداء وجلسوا في انتظاره
مـقـلـع: اجل انتي اصلك عجميه يقولون شيابنا اللي كانوا يداوون عيونهم بايران بعبدان وشيراز والله من الزين بحريمكم
نجلاء: اجل سافرت لايران انت
مـقـلـع: لا ربعنا وصدق ان كلامهم ماكذبوا به شوفي كلك ملح وقبله
نجلاء: كأني افتهمت انك تتغزل
مـقـلـع: لا اعلمك عن هرج شيبانا والا انا من جنبها بالغزل كوود اسلهم بعيوني
نجلاء: وش يقولون بعد
مـقـلـع: يقولون بكم موت حمر بس بكم افةٍ شينه
نجلاء: شنو كلامك
مـقـلـع: يعني بكم عيب واحد ينقص من زينكم
نجلاء: شنو
مـقـلـع: لكم شنبات لو تحفونها كان وش ملحكم( ياملحها بس لو يهديها هادي الرشد وتخلين اضارب باسهمها ابرك من سوقهم) ا
نجلاء: ههههههههه الله يقطع عيارتك افتهمت عليك
مـقـلـع: وانتي قدامي هالحين كل الحلا بس اللي قلت لك
نجلاء: اجوف صرت تمون وتقط خيط وخيط ههههههه
مـقـلـع: هذي وصاة الشباب لي بالاستراحة خلك مع البنت دغري
نجلاء: الله ....جذي عييل
مـقـلـع: طيب وش شغلك بالسوق
نجلاء: انا بالمراقبة
مـقـلـع: اجل بتفيدني انا ودي اضارب بالسوق
نجلاء: استثمار طويل ولا قصير
مـقـلـع: لا شي عجل وناخذ المقسوم ونرجع للدوام
نجلاء: ما اخاذ اجازة من عملك
مـقـلـع: أي اجازة كلها تلفون لابويوسف يوقع عني الصبح وسلام عليكم
نجلاء: ان زين وكم استثمارك
مـقـلـع: 1700 ريال ا
نجلاء: حسب بالي لك ولا لكين
مـقـلـع: وش لكوكه الله يصلحك لو معي لك اجي البحرين كان اروح بورصة نيويورك ههههههه
نجلاء: بعد عييل بس نتغداء نروح للسوق واسلمك سمسار يساعدك
مـقـلـع: سمسار لايكون سمرمدي ويلعب بقروشي ماودي يضارب لي الا انتي
نجلاء: بس ماعندي رخصة انا
مـقـلـع: يابنت الحلال كله ضربة حظ واخذ المقسوم وانكس
نجلاء: انكس!!! شنو يعني
مـقـلـع: ان ساعدتيني شرحت لك انكس ههههه
نجلاء: يالله خل ادفع الحساب ونمشي
مـقـلـع: مايصير تحاسبين وانا موجود افا وش يقولون عني بخيل ولا بنت تحاسب عنك قسم بالله فيها قبايل ذي كان وش يفكني من لسان الجماعة
نجلاء: انا اللي داعيتك
مـقـلـع: علي الملازيم ماتدفعين قرش
نجلاء: كريم ياقــلــوعــي هههههه
دفع الـمـقـلـع الحساب وذهب كل منهم الى سيارته متجهين للسوق وفي السوق دعت نجلاء احد السمسارة واسمه عبدعلي ليساعد الـمـقـلـع في المضاربة
جلس الـمـقـلـع على طاولة بعد ان احضر له عبدعلي علبة كولا وماهي الادقايق حتى عاد اليه
عبدعلي: حظك موطيب اليوم مـقـلـع الشركات الخليجية كلش هابطة
مـقـلـع: يقول في نفسه (من شفت وجهك وانا داري مابالعنز لبن) ا
عبدعلي: هاه ياقــلــوعــي نشتري اليوم ونبيع اذا طلع السعر
مـقـلـع: قــلــوعــي في عينك الشرهه علي اللي جيتك وين نجلاء بس
عبدعلي: شنو تقول ياقــلــوعــي ماافهميت عليك
مـقـلـع: وين نجلاء بس
عبدعلي: كاهي يت
وتقبل نجلاء تتبسم للمـقـلـع ويحدث نفسه( الله من صك عليك بشقيقتن
بشارع الخزان كود نسلنا يتحسن عن هالشهبان) ا
مـقـلـع: وين رحتي وخليتي هاللي مايعرف للسوق يحوسني
نجلاء: اشتريت شي
مـقـلـع: لا هونت مادامها الدعوى بربسه على بالي اجدع حظك والا هو قايم يتعبرد
نجلاء: هست سمسار غير
مـقـلـع: هست يعني فيه صح هههه صرنا نترجم
نجلاء: عدال
مـقـلـع: لاانا هونت عن السوق بدوج بالبحرين وانكس لديرتي
نجلاء: انكس يعني ارد صح ههههه
مـقـلـع: فهمتيها هههه ان زين هههه
نجلاء : طيب الليله اختي بتعرررس ممكن تكون ضيف عندنا
مـقـلـع: ياشين هرجكم البنت تقول باعرس ماهو بتعرس يانكم فشيلة بهرجكم.... باحضر عرس اختك وانكس اجل
نجلاء: ان زين عييل خلك بالفندق وامرك بعد الدوام الساعة خمسة
مـقـلـع: أي فندق ماعندكم مسجد بالسوق؟
نجلاء: الا المسجد كاهو بالدور الارضي
مـقـلـع: اجل بتلين بالمسجد واذا خلصتي ازهميني
نجلاء: ان زين

المشهد الرابع

في فندق الدبلومات كان زواج اخت نجلاء وكان المـقـلـع بين الحضور المـقـلـع يحدث نفسه( ياكثر الزين بهالعرس يانهم خاشين عنا بعروسنا الله لو انا العريس كان اطق باصبع هالليله) وتقبل نجلاء في ابهى حلتها
نجلاء: قــلــوعــي تعال باعرفك على العرسان
مـقـلـع( ياقلبي اركد ابوك يالزين) يالله
وتقدم نجلاء العروسين للـمـقـلـع وتتقدم من احد النساء في متوسط عمرها
نجلاء: هذي خالتي بروين وتهمس في اذن الـمـقـلـع(تبي تعرس جوف خالتي) ا
مـقـلـع: يالله حيي بروين
بروين: حيياك
مـقـلـع: نجلاء ماودكم نكمل الفرحة وتشوفون لي عروسة ونخليها ليلة خليجية
نجلاء تضحك وتشير لبروين: حدك العروسة بس توافق
مـقـلـع: ياليت وتصير اتفاقية مجلس التعاون هههههه
بروين: وين من اول نظرة بس بس تعرس
مـقـلـع: مادام نجلاء تقول امرها يمشي علينا
بروين: طيب عرّس على نيلاء مادامك هاويها
نجلاء: خالتي بروين تحب تتغشمر ولا قــلــوعــي زين الشباب
مـقـلـع: مشكورة نجلاء على هالمجاملة ترى اهل البحرين اهلنا واسعد الساعات ان تصير لي زوجة بالبحرين وخميس وجمعة وانا محضر عندها
بروين: بس خميس جمعه وباقي ايامك؟
مـقـلـع: خبرك الدوام بالرياض مايعطونا اجازات
بروين: كلامك عدال ومنها تقل المشاكل بين العروسين بس من يجوفون بعض على شفقه
مـقـلـع: هههههه اجل نعرس على قولتكم هههههههه
نجلاء: لاتعجل قــلــوعــي خل نسئل عنك
مـقـلـع: ماعندي مشكلة عندكم بـنـات الـمـنـتـدى إسألوهم عني وعن أخلاقي
بروين: من هاذيلي
مـقـلـع: نجلاء تعرفهم
نجلاء: جوفي الريال قال تعرفهم من جفتك وانت بس المنتدى والمنتدى ولا دريت منهم
بروين: كم رقم الـ (سي بي ار) حقك ونجيب معلومات عنك
مـقـلـع: وشو هالسبيار يعني
نجلاء: هاي البطاقة السكانية بالبحرين قــلــوعــي ونجيب بها معلومات عنك
مـقـلـع: منتب سهلين والله طيب خذوا رقم بطاقة الاحوال
بروين: ماينفع
مـقـلـع: مادام قبلتوا بالفكرة الباقي يتسهل بس باقول شي
بروين: شنو
مـقـلـع: انتي يابروين اذا اعرسنا ترا شهر العسل بنروح للطايف براد وبرشومي وعسكريم ابو نص متوفر
بروين: لا ابي ماليزيا
مـقـلـع: ماليزيا فيها السارس الله يدفع عنا البلا وانا اخاف عليك
نجلاء: عاشوا ههههههه قــلــوعــي طب ولا احدن سمى عليه
بروين: ( بعد ان احمرت خدودها على كلمة مـقـلـع) ان زين
مـقـلـع مـقـلـع قم صل جعلك للصل المعنصل ترى اذن الفجر من شوي وبتقيم الصلاة
مـقـلـع: اعوذ بالله من الكوابيس ياشين اللي ينام دابغن له مراصيع
وملحفهن لبينه

منقول من إيميل :D

[ابوفهد]

:):):)
:):)
:)

رااااائعه القصه

مشكور خيالي وكثر من هالسوالف
:)