اصنـعوا لآلِ غـَزَّة (( ........ )) فإنهم اليومَ في شـُغل !!

[كريم_كرم]

عاوزين ..

عاوزين نحُط نفسنا مكان أي حَد من غزة .. أي حَد

الحـَد دَه .. ممكن يكون مات له .. أم .. أب .. أخ .. أخت .. ابن .. أو .. ابنة .. صح ؟؟

طيب ..

الحـَد ده .. أهله طبعاً هايكونوا راحوا في القصف ..

والقصف .. طربـَق البيوت .. أفناها .. ما خلاش فيها طوبة نافعة ..

طيب .. معنى كده .. إن مستلزمات حياة أهلنا في غزة .. الحياة اليومية يعني .. مش موجودة عندهم دلوقتي ..

إزاي يعني ؟؟ ..

يعني .. لو الواحد عاوز ينام في أي مكان متغطي .. هايلاقي بطانية ؟؟

طيب .. لو صحي الصبح عاوز يشرب شوية مية .. هايلاقي الكوباية اللي هايشرب فيها ؟؟

ده إذا كان فيه أصلاً حاجة يخزن فيها المية " جركن مثلاً " ..

لو عاوز ياكل .. هايلاقي أطباق يحُط فيها الأكل ؟؟ هايلاقي ملاعق .. شُوَك .. سكاكين مطبخ ؟؟

الطفل اللي أمه جريت بيه وهي بتهرب من بيتها أثناء القصف .. هايلاقي لبس يحميه من برد الشتاء ؟؟

هايلاقي لعبة تحرك الضحكة في عيونه وتدخل الفرحة جوه قلبه البرئ ؟؟

الأمهات والأخوات اللي كان كل ما واحدة وهي بتهرب من القصف تيجي قدام كاميراً تلاقيها مشغولة .. بتغطي شعرها ..

سبحان الله .. شوفوا الكرامة .. شوفوا الشرف .. حتى في عز الأزمة ..

الأمهات دول .. في عز الشتا ده .. هايلاقوا شال يغطي شعرهم ..

وحاجات كتييييييييير تانية ..

ببساطة أنا كاتب الموضوع ده علشان أقول لنفسي وللكل ..

جرب كده .. تشوف كل يوم إنت بتعمل إيه ..

وشوف الأدوات اللي إنت بتستخدمها للقيام للي إنت بتعمله ده .. واسأل نفسك السؤال ده ..

أخويا أو أختي اللي في غزة .. لو عاوزين يعملوا الحاجة دي .. هايلاقوا الأدوات اللي يعملوها بيها ..

دلوقتي .. الحكومات اتبرعت صحيح .. لكن .. يوم الحكومة بسنة .. دي حاجة ..

ابعت لإخواتك في غزة .. طبق من جوة بيتك .. بطانية .. طقم سرير .. طقم ملاعق .. ملابس .. كتب ومصاحف .. مواد غذائية القابلة للتخزين والنقل .. زي البصل مثلاً والثوم .. والسكر والدقيق والأرز .. الألبان .. والمُعَلـَّبات .. مِصليات .. سجاجيد .. أحذية .. شرابات .. أدوات مكتبية جديدة " كراريس ومساطر والذي منه " لأطفال غزة .. حتى الأوراق التي لا تحتاجها في بيتك .. قد يحتاجونها .. للتدفئة مثلاً ..

المهم .. أي حاجة .. أيىىىىىىىىىىىىىى حاجة .. تلاقيها في بيتك .. هاتنفع إخواتك في غزة ..

إبعَتهالهم ..

مع مين ؟؟ .. مع أهل الثقة .. أكيد هاتلاقيهم حواليك ..

إنت بس .. دَوَّر

[dalaal]

جزاك الله خيرا على التذكرة .. ومع التبرع لاننساهم من دعواتنا ليل نهااار ..

[اشراقة قلم]

[frame="8 80"][/frame]