أم سعيدان وأم هيثم في صلاة التراويح

[ابوراكان]

نعلم جميعا أن الأصل في صلاة المرأة هو أن تصلي في بتيها
أم سعيدان
أفطرت ام سعيدان وصلت المغرب وشافت طاش ما طاش وشافت صادوه في الحلقة اللي مع فرقة التمثيل عبدالعزيز الهزاع

ثم لقطت البشت والديرمة والسجادة وجلال الصلاة وطلعت من البيت ووصت الشغالة على البزارين وتنتبه للدينمو حق المويه تراها مشغلته وأهم شيء تقطع البصل والطماط وتخمر الرز وتطلع الدجاجة من التلاجة عشان اذا رجعت تشرع في ضبط الكبسة

لا إله الا الله اللهم صلي على محمد اول عبارة قالتها بعد دخولها المسجد ودخلت وصلت العشاء ثم ادت السنة وبعدين قعدت مع أم دحيم لين يبدا الامام بصلاة التراويح

هاه يا ام دحيم وش اخبارتس واخبار ابو دحيم ودحيم وشلونه وشلون حرمته
وش افطرتوا اليوم
ابد خبرتس يا ام سعيدان شوربة ام عسكري ومكرونة وسمبوسة بس خبرتس ابونا ما يحب شوربة ام عسكري يبي شوربة جريش يقول انها زينة لبطنه بس الله يهديه ابونا من يوم يذن المغرب يمسك دلة القهوة ويقعد يقحن فيها لين تطلع مع خشمه واذا تعشى وشبع احترت تسبده وقام يلاغيني انتي يالرفلا ما تعرفين تطبخين كل ما كليت خرابيطتس ها اللي تمطريسنها مع العشاء شبت تسبدي ضو طلعت تسني مخبز تميس (( بلا والله من القهوة اللي تحشاها مسمار

جتك عاد ام سعيدان
قالت لا ابشرتس اليوم صج على ابو سعيدان الظهر وقال انه مشتهي مرقوق وانتي تعرفين المرقوق يبي له تعب وحطزة قدام القدر ساعة وانتي تعرفين ركيباتي معاد تساعدني طالعة تسنها ماصات فصلنا في محو الامية كل ما حرتها انكسرت
والله وصلحت له المرقوق ولا ذاك منه الا لقمة او لقمتين وكله بسبة انه قام يقحن من الشربيت لين طلع وجهه احمر يقطر توت تسنه روج طقاقة

على طاري المرقوق امس الله يكرم النعمة ارسلت لنا جارتنا ام صويلح سمبوسة الله ينعم بها بس ماصخة ماصلة الكراث اللي فيها مخور واللحم الي معها محزر والله ولا كليناها
مدري وشلون ابو صويلح صابر على حرمته بس يقولون انها فاشحة عليه ومغير حاطته الخروف رابطة في رقبته حبل وتمشيه (( عز الله صليتي انتي واياها انتم جايين تصلون والا تحشون حريم خلق الله لا وفي المسجد ))

على طاري ام صويلح ماشفتي جارتنا الجديدة أم حمد بعد تصدقين انها في ها الرمضانية المباركة من تصلي العشاء تلقط بشتها وتروح مع السواق مغير مطامر من سوق الى سوق ولا قد شفتها لو مرة وحدة تصلي معنا التراويح الله لا يسخط علينا بس عسى الله ما يعاقبنا بسبتها (( أقول أها بس الا ليت الله يفكنا منكم ومن روحاتكن للمسجد )
تقولين يا بنت أبوي تسنها من حماية المستهلك اللي يذكرون ولا يشافون بس هي تذكر وتشاف كل يوم في سوق



الله أكبر (( الإمام كبر لصلاة التراويح ))

أقول قومي انتي واياها صلوا من بقي بعد من الحارة ما حشيتوا عراقيبه
حتى وانا في المسجد ما رحت لا لسوق ولا سكة لاقطيني وانا اسمع (( كفشتهم جارتهم أم حمد وهم لاقطينها))

ما ذكر أعلاه نماذج قلة ممن جعلن صلاة التراويح مكان للترويح عن انفسهن وتقطيع أعراض خلق الله وفي بيوت الله

[خطاب]

اضحك الله سنك .!

[الكاغد]

هههههههههههههههههههههههه
مع الاسف هذا حال بعض المسلمين عموما وليس النساء

[ابوراكان]

شكرا اخواني على المرور والتواصل.