خطيبتــــــي المثقفه

[albohajm]

-----خطيبتــــــي المثقفه



كنت جالس في غرفتي واتأمل صورة وائل كفوري واقول خلق وفرق ، هذا امه متنسيه بخصاب يوم انها حامل به والا وش ذا الحمرة الي تقطر ، ياحظه من يوم بيخطب والبنت بتوافق عليه



وانا منقهر لان امي وابوي رايحيين للرياض علشان يخطبون لي بنت ناس تجار



لان ابوي يقول لازم نحسن النسل <<< مدري وش دخل النسل بالفلوس لكن الشايب ابخص>_>>_>





والمشكله ان هالبنت مثقفه مرررررررررة وانا ثقافتي لايمكن الاتصال بها الآن



والحالة المادية مستتره يعني مدري هي بتوافق والا لا



شوي الا اسمع صوت بواري سيارة ابوي وانزل لهم بسرعة والقى الوالدة، يخليها ربي توها بتدخل البيت ، قلت هاه وش قالت وافقت عسى ما قالت ابشوفه. قالت امي اصبر شوي خلني ابفصخ بشتي واصفطه لاني مطيبته بدخون عندهم وش زين ريحه وعطني التلفون خلني اكلم ام فهيد اعلمها اني ذقت الكيوي الي يقولون عنه



قلت ياميمتي والله انتس فاضيه البنت وش قالت عساها وافقت بدون شروط والا ترى بوش بيدبج بيتهم ، قالت امي ايه وافقت لكن بشرط انها تقابلك وتجلس معك وتسألك اسئلة وعلى ضوئها ، تسني قلت على ضوئها ياربيه احس ان لساني انطلق عقب هالكيوي ، تقرر هي توافق والا لا



قلت طيب ياميمتي معزمه هي ، قالت مررررة، هذا شرطها وتقول بعد لازم يكون هالكلام بعد يومين ، بس وش هالبيت عندهم؟ بايكتهم في وسط البيت من كبره وهاالشجر وهاالبلاط الي اسمه سناميك تمشي على سناميك في سناميك ، قلت لها وشو سناميكه يابنت الحلال هذا اسمه سراويس، المهم البنت زينه؟



قالت يقول زينه ياولدي هذه البنات مهوب بناتنا في هالديرة ما تفرقهم عنكم الا بالصلاة في المسجد هذه طول وعرض وشعر وخشيم وعيون قلت يمه بس ترى ما اتحمل قالت لا اجل لو تشوف صهروجهم والله انه ازين من غرفة نومي ومن زود الطغى حاطين فيه تلفون



قلت يمه الحين اقول علميني عن البنت وانتي تقولين حمامهم زين ، اقول وين ابوي هو الي بيعلمني بكل شي وشوي الا هو داخل قلت هلا والله هاه يابوي وش رايك قال والله لو تشوف مغاسل الرجاجيل قلت ياربيه هذه غلطتي اني ما رحت معكم ، بس يالله تقول بعد يومين بتقابلني مهيب مشكله اقابلها بعد يومين وش يصير؟





وانا طالع لغرفتي وتلحقني امي وهي تقول لحظه وقف شوي ووقف انتظرها وش تبي يوم وصلتني وتطقني في راسي وهي تقول ( حبشه ) وتروح تركض واسمعها تقول والله ما توقف علي <<< فسقانه هالعجيز .





المهم رحت لغرفتي ادور لي ثوب زين ولقيت ثوب الدوام ينتواجه به بس المشكله هالشقوق الي في رجلي وشلون اغطيها مالها الا شراريب بس الشراريب تبي كنادر ، مهيب مشكله محيميد ولد جيرانا توه متعين عريف في الجيش وصارفين له كنادر لماع وش زينها اباخذها. كلمت ابو حميد وقال والله عندي خفارة ماقدر!



جاء اليوم الموعود واكشخ في الثوب والاقلام واكحل عيوني لاني اكتشفت ان فيها دمل ، وقبل ما اركب السيارة مسكني ابوي على جنب وحط في غالوقتي حبتين ليبتون قلت له وش هذه علشان الحسد وضحك وقال وش يحسدونك عليه هذه وانا ابوك علشان تثقلك، خابرك خفيف . ركبت السيارة واتجهت للرياض.



وعلى الوصف لقيت بيتهم طقيت الباب وفتح لي ابوها وهو لابس بشت وغترة بيضاء بدون عقال ويتكلم باللغة الفصحى قال من انت ، قلت انا زوج بنتك الي مابعد اعرست عليها << الله يذكرك يافنان بالخير ، قال قصدك بانك انت من خطب ابنتي واليوم موعد مقابلتك معها قلت له ( يس ) على بالي فصحى قال تفضل وادخل معه وقال لي تصدق يابني انني لم ارى في حياتي قط وقاطعته وقلت وين بتشوف القطو فيه وهذا بيتك تعال عندنا في الديرة من درجة الميانه بينا وبين القطاوة نسلم على بعض ولو انك في السيارة تدق لها بوري قال لي عن ماذا تتكلم ويحك قلت له لا مو لهذه الدرجة انه يحك لك ظهرك الا كانك مربيه من يوم انه صغير وناظرني شوي وقال ثكلتك امك قلت له اسكت ياخال مابقي الا هي الي ما كفلني والا كل أهل الديره كافليني وتبسم وقال سادعو لك مها حسيت انه درى اني ميح .



شوي ودخلت علي مها واقوم اتنحنح واقول رجال رجال لكنها دخلت وصكت الباب ، وش هالمها كانت لابسه تنوره حمره وبلوزه بيضا وعدسات لونين وقالت مساء الخير واقوم اشاهق واتكلم تشني بزر يتسبح في برد ، بس فهمت اني اقصد مساء النور وقالت لي وش تشرب قلت لها عصير ( قها ) << قديم مرررررره وينفتح بمفتاح الصلصه ، قالت وشو هذا قلت منجا قها ما تعرفينه قالت يعني منجا قلت منجا منجا اتصلت بالتلفون وقالت عطونا عصير منجا.



المهم ودي ابداء معك المقابلة قلت تفضلي قالت انا اسمي مها وشهادتي ماجستير في علم الاجتماع قلت انا ما يهم جوالي استقبال فقط ومعيد ثالث ابتدائي يعني تاريخ وجغرافيا لاتسأليني ما خذناها ، تبسمت وقالت ما يخالف نبدأ؟ قلت على بركة الله! قالت كم راتبك؟ قلت الف، قالت ايش؟ حسيت انها زعلانه! وقلت الف وادور هاليومين على وظيفه احسن من وظيفتي، يعني بيصير راتبي فيها سبعه الاف <<< تشذوب ، قالت انت الحين تعرف انه لازم ان نقاطع المنتجات الامريكية، يعني مثل الماكدونالديز، وش رايك ؟ قلت شوفي، اذا هي في استراحة ومع شباب تعرفهم انا ما عندي مانع <<< احسبها تتكلم عن الويك اند! كتاب تعلم اللغة الانجليزية في اسبوع حاسني . ناظرتني شوي وقالت طيب باين انك رومانسي، انت تعرف نزار قباني ؟ قلت شوفي الخنفسان انواع والقبان هذا اصغر انواعه وشلون عاد اذا صار نزرة قبان وش بتجي << واحط رجل على رجل واثق الولد ، قالت طيب الدول الاسكندنافيه وش رايك فيها ؟ قلت والله شوفي مع العلم انه يجيب لي حرقان لكن نسكافيه مع الحليب عادي اشربه قالت طيب الجغرافيا هذه ابد ما تعرفها قلت ابد قالت حتى المناخ؟ قلت لا المناخ اعرفه، يصرف لنا ثلاثة الاف ريال كل سنه لكن ان شاء الله بيضيفنا ابوي معه وابشرتش بتصير تسعه.



قالت وش رايك في العولمة؟ قلت شوفي الاظافر عندي والله اني اقصصها وما خليها تطول عيب! والله يوم شفت عيونها تقلبت قلت عن اذنك الحمام واقوم واروح للحمام وشوي الا القى في رجلي قطعة زوليه فخمه مررررررره كانت في المجلس اثرها نشبت في الشقوق الي في رجلي وسحبتها معي ، رجعت للمجلس ولا لقيت احد في المجلس وانتظر الى اذن العشاء ولا احد دخل علي وشوي الا الشغالة داخله علي ومطفيه انوار المجلس وافهمها وارجع لبيتنا.



تدرون وش صار ........ الغريبه انها وافقت لانها تقول لازم يكون لي دور في المجتمع وبينفعني هذا في تحضير شهادة الدكتوراه وابيه قريب مني ، وابشركم العرس بعد كم شهر بس شارطين اني اسكن معهم وانا متردد . هاه!!! وش رايكم؟ اخذها واسكن عندهم والا وش تقولون؟؟؟؟؟؟؟؟؟؟؟؟





منقووووووووووووووووووووووول

[الكاغد]

هههههههههههههههههههههههههههههههههههههههه

تصلح سهره تلفزيونيه

[الكناني]

اضحك الله سنك
خذها ولا تتردد على الاقل يكون لك دور وتدخل التاريخ عن طريق رسالة الدكتوراه .
تحياتي