ياللي تلوم الوقت وش ذنبه الوقت
يخطي ردي العرف و يلوم وقته
غيرك عرب ذاقوا من الوقت ما ذقت
وانت السبب في ما حصلك وذقته
العام يوم انصحك من كلمتي ضقت
وهذي نتيجة دربك اللي عشقته
غزوة مهنا اللي بها ما توفقت
مدري سبقك الخير ولا سبقته
لا تحسب انك في سما الكون حلقت
تبطي عظم واللي تبي ما لحقته
ما دام في حبل الرخامه تعلقت
اطبخ جليس السوء واشرب مرقته
هذا الرفيق اللي بحبه توهقت
اللي مدحته لين بشّت عرقته
واليوم يوم انك عرفته وصدقت
العن ابليس ورجـع اللي سرقته
رشيد الزلامي رحمه الله