السلام عليكم ورحمة الله وبركاته ..
انا معك يالرشيد في بعض الاخطاء في نهج القصيبي .. واختلافي معك في انك ركزت على انه بسياسته طال الشركات الكبرى فقط .. والاختلاف شيء صحي وهو احد طرق المعرفة وما نحن إلا نتناقش بهدف الوصول للنظرة الصائبة من دون ان يزايد اي واحد فينا على وطنيتنا فمنانا ان نصبح على يوم تكون كل الأعمال والوظائف بأيدي سعودية. ولكن ؟؟
ليس بهذه الطريقة التي ينهجها القصيبي وعمر الإصلاح والحلول الجذرية لأي مشكلة ماتحل في يوم أو حتى شهر وسنة أو حتى بقرارات لا ارضية تبنى عليها.
مؤيدوا القصيبي في نهجه يعتقدون انه سوبر مان او الرجل الذي لا يخطئ .. حتى انه يتضح لي من بعض المداخلات استبعادهم لأي خطأ في نهج القصيبي .. وتعالوا نتطرق لبعض الامور للتضح الرؤيا في نهج القصيبي.
القصيبي بيسعود الحلاقين .. بيسعود البقالات .. والسؤال هنا كم معهد يخرج حلاقين لدينا ؟؟! ولا بيجعل بعض السعوديين يتعلمون الحلاقه في رؤوس بعض ؟؟
وماهي الخطوات التي قام بها مع مؤسسة التعليم الفني والمهني لإيجاد عدة معاهد في عدة تخصصات تغطي مايحتاجه سوق العمل ؟؟ وحتى لو فيه معاهد تخرج حلاقين وبائعين فكم نسبة الخريجين اللي تتناسب مع كثرة هذه النشاطات والنشاطات البسيطة التي معروف ان محدودي الدخل هم من يفتتحها ؟؟
بصريح العبارة القصيبي حط همه وفرض قوته على الضعوف .. اما اصحاب المصانع والبنوك والشركات الكبرى اللي هم في الاساس الاقوى دخلاً والاقدر في صرف رواتب تتناسب مع طبيعة معيشة السعوديين ما شايفين اي خطوات جاده اتجاههم بالشكل الحقيقي.
نحن ننتقد بعض الدول اللي تصدر لنا عماله لا تفقه شيء فاللي جايه علشانه .. ونحترم العمالة الفلبينية المقتدرة في الكثير من التخصصات .. فهل القصيبي يريد منا ان يكون السعودي ابو العريف يعمل في اي شيء حتى وان كان لا يعرف به .. علموه اول وحطوا المعاهد اللي تخرجه وهو مقتدر فيما سيعمل فيه وعارف به .. وقتها هو من سيفرض نفسه ويجعل الكثير يتسابق عليه ثم فكروا في فرض السعودة على أي مجال يوجد به خريجين كثر.
الآف المصانع عندنا نسبة السعودة فيها ضعيفه ؟ ومع ذلك بالله عليكم كم معهد يخرج ما يغطيها؟
شركات كبرى على مستوى الشرق الأوسط لا السعودية نصف الموظفين فيهم من الاخوان العرب وبعض الجنسيات الآسيوية؟؟
بنوك كبيرة تدخل عليها تلاقي سرا طويل وغالباً ماتلاقي غير صرافين اثنين يخدمون هالاعداد وغالب الفروع منها لو عديت الموظفين فيها ماتلاقيهم يزيدون عن عشرة ؟؟!!
ادخلوا صناعية السيارات مثلاً وعدوا كم عامل امام كم سعودي اتحدى ان تعدت النسبة 2% لا وبعد متفاءل .
ادخلوا محلات قطع الغيار اللي كاوين هالعالم ومحتكرين القطع وشوفوا من يبيع لكم القطع؟؟
ادخلوا المكتبات الكبيرة وشوفوا من اللي بيحاسبكم؟
حتى الاسواق الكبيرة اللي تفتح 24 ساعة .. تدخل مداخيل الله يزيدهم ويبارك لهم ومع ذلك مازالت نسبة العماله فيها هي الاكبر لا السعوديين.
انا ماني متحامل واتمنى ان القصيبي او حتى غيره يصل بالسعودة لنسبة 100% .. ولكن مو على حساب اصحاب المشاريع الصغيرة وغض النظر عن اصحاب المشاريع الكبيرة اللي حتى الرواتب هم الاقدر في صرفها بما يتناسب مع احتياجات المواطن.
تارك كل هاللي يدخلون الملايين في اليوم .. وجاي على منشآت صغيره حتى وصفها بمنشآت كبيرة عليها ولا بقالة يقال لها منشأه .. طيب راعي البقالة الصغيرة وعلى كثرتها وش بيدخل علشان يعطي سعودي مرتب يتناسب مع احتياجات هالمواطن .
وعلى فكرة وبما اني ضربت البقالات والحلاقين كمثال .. اقول صديق لي شارح القصيبي على طلبه عماله لحلاقين بيكتفى له بواحد ويبحث عن سعودي ؟؟ ابحث عن حلاق سعودي وين بلاقيه هذا .. اتمنى بس وينه ووين المعهد اللي يخرجه.
والبقالات فيه تنظيم يقول اذا كانت البقالة اكثر من 40 متر يعطى عامل .. أقل من 40 متر يعمل بها سعودي .. وان كنت خطأ فانا اشكر من يصححني ويوجهني للصواب .. احد يعاف احد يوجهه للصواب؟
خلاصة القول .. من يعاف ان يكون كل قرارات القصيبي في محلها .. ولكن لطالما الموضوع متعلق بالوطن والمواطن .. فمن المفترض ان نقول لمن اصاب اصبت ومن اخطأ اخطأت .. وما القصيبي الا بشر يخطئ ويصيب وهو اصاب في امور واخطأ في امور .. هذي هي السالفه بكل بساطة فليه التشنج وهالدفاع الغير مبرر عنه؟
|