بخير جعلك بخير اخوي
بصراحه انا عاجز عن شكرك على اهتمامك واعطائي هذا الوقت الغالي للاجابه على اسئلتي وارشادي للطريق الصحيح جعلها الله في موازين اعمالك .
بصراحه ليس لي استراتيجيه واضحه حتى الان وللمعلوميه فأنا جديد على الاسهم ولي تقريبا ثلاث شهور وخلال هذه الفتره خضت كذا تجربه وجميعها لم تكن مبنيه على تحليل فني بل كانت اما لاخبار على السهم او لسعره المغري من وجهة نظري بناء على متابعة مسبقه لسعره ومداه .
ودي اعطيك مثالين لاسهم شريت وبعت فيها ومسببات القرار في كل سهم على حده فأرجو ان تتحملني .
اولهم سهم القصيم :
كان وقتها الكلام على ان السهم سيتم ايقافه لسداد اقساط متبقيه عليه ,,وقتها كثر الكلام اللي يوصي بشرائه لانه بيرتفع بعد السداد واللي يقول بينزل عموما انا ما اقتنعت بسالفة ان اللي بيسدد الاقساط بيستفيد ولكن استمرت متابعتي لهالسهم وما يكتب عنه وبعد اعادة السهم للتداول نزل وارتفع لم يتغير عما قبل السداد بعدها نزل اعلان يطالب الملاك لاجتماع لاقرار تجزئة السهم .... وبما اني جديد استغربت عدم تفاعل السهم ايجابيا وكنت محتار .... المهم شريت السهم وبدأ رحلة الصعود وبعته بمكسب ورديت شريته مره ثانيه وكنت مقرر اني اتخلص منه قبل التجزئه وكان هذا القرار نابع من التحليل الاساسي للسهم ( خسران ) وفعلا بعته قبل الاحقيه بيومين وهذه كانت تجربه مربحه رغم استغرابي الذي لا زال قائما وهو لماذا لم يتدافع الناس على السهم الا بعد تجاوزه الميئتين ؟
المثال الثاني مع المجموعه السعوديه :
وكانت بعد اعلان الارباح الاخير عندما انهار السهم بسبب تدني الربح الموزع على السهم عندما نزل السهم من 510 الى 460 شريته 465 بعده دحدر الى 406 وبدأ بالتأرجح بين 420-440 عدلة بالجزء المتبقي وشريت ب 430 وصبرت عليه شوي الين صار بين 448-455 وقتها قلت اعدل وبعت ثلث الكميه ب 455 وبعدها بثواني الا السهم واصل 480 يعني ورطت صح وقتها,, المهم عشان اعوض خسارة الكميه اللي بعتها حددت السعر لباقي الكميه ب 489 ونزل السهم للسبعينات ثاني يوم عدلت سعر البيع ل 484 والله توي عدلت السعر الا وهو يطمر ل 496 ..طبعا كل شيء مكتوب والحمد لله على كل حال.
الشيء المهم اني من بدايتي وانا كل يوم احاول اطقطق بالميتاستوك ولله الحمد تعلمت جزء كبير من قراءة المؤشرات المهمه مثل الماكد , مؤشر القوة النسبيه , البطيء وغيرها ومازلت اتعلم .
ولكن مازال ينقصني الكثير
يعني ابي ترشح لي كم مؤشر وبالترتيب عشان امشي عليها واعتمد عليها في :
- تحديد سعر الدخول والخروج ( هل اكتفي بنقاط الدعم والمقاومه ) .
- تحديد قمة وقاع السهم .
- المؤشرات التي تدل على استكشاف الفرص الموجوده بالسوق .
وبالنسبه لسؤالك فأنا ليس لدي مشكله ولله الحمد باللغه الانجليزيه
انا عارف ان طلبي صعب شوي ولا راح الومك لو ما رديت ويكفيني اهتمامك وهو محل تقديري وتقبل تحياتي