قبل تجهز شنطتك وأغراضك وقف !! عندي لك كلمتين ودي أقولهن :
وين ناوي تروح له ؟ وش تسوي هناك يوم تروح
ليه وما عندنا جو ...؟
يا خوي كل سنة وأنت تروح برى وتسوي حركات نص كم .
تشرب وتطرب وتحول وتركب .
ولا يوم فكرت إنه بيجيك شيء ، على عماها ، مروووح وحالتك حاله
حتى فلوسك اللي معك متسلفها ومجمعها ومولفها .
يا خوووي وينك رايح !! شغل مخك ... حياتك كل سنه كذا ،
كلما قربت الإجازة قمت تصول وتجول كأنك عايش في قفص
كم قارورة شربتها لتر؟ لترين دبه دبتين دنه دنتين ، عييت تروى ومتى تروى !!
والسهرات الحمر كم حفله حضرتها ما تنزعج من الأصوات والصجة وتذكر لو يحصل للملهى خسف وتروح معهم فيها ، والنسوان والصبايا البغايا ... وكأنك ما سويت شيء والأمر عندك عادي .
ترى يمكن يجيك الموت ويصفط ايامك ، وتجينا ملطخ ، ووجهك منفخ ، ريحتك شينه ، وعليك جنابه بعد (يالله منك ) وقلبك ، والصلاة ما علمك بها علم ناسيها ، لا وبعد تقول على السعودية وع !! مطاوعة وهيئة ، وبراقع وبشوت ، عاجبينك الربع هناك صل ما تصلي كله واحد ، والنسوان هناك زلط ملط مبسوط منهن هاه .. ، والشراب عندهم بالوايتات وتشرب لين يظهر مع خشمك ، والأمر عندك عادي !! وناسي إن فيه تاريخ انتهاء لعمرك ، بس يا ويلك لو يجيك الموت وأنت مجرم ومخمور وزاني مع الحظ وعندك شيء ثاني ما ندريبه ، فكر يا خووووي في الشرب اللي تشربه يخلك مجنون ودمك يصير مشحون ، لا والنسوان اللي ينامن معك ما تخاف من شيء إسمه نقص المناعة ( الإيدز) وألا جسمك ما يدخله فيروس قوي وبطل ويتحدى الأمراض ، إسمع قبل ما تطير وقع ؟لو جاك الموت وأنت تارك للصلاة ترى المسئوولية عليك ما هي علينا
لوجاك إيدز ومرمر حالك ترى المسئوولية عليك ما هي الصحة
أسمع ترى لوجيتنا مسروق ودراهمك راحت ترى ما هي مسئوولية شرطتنا
أسمع ترى لوجيتنا وفكرك مشوش ترى ما هو مسؤولية تربيتنا وتعليمنا .
أسمع قبل ما تدمن ويصير دمك مسموم المسؤولية ترى ما هي مستشفيات الأمل عليك أنت ،
أنت اللي ورطت نفسك في هذي البلاوي وكل سنة وأنت تطير من ديرة العفه والطهارة والإيمان الى ديرة الموت الأحمر والفتن .
متى يا خوي تعقل وتصير سياحتك في ديرتك ، ودراهمك لديرتك ، وإجازتك في ديرتك ، عند أمك وبوك وأختك وأخوك .... المهم قبل ما تطير وقع إنك ما تسوي غلط وترى إن سويت هناك شيء الدين مردود والحبل معقود ودقه بدقه ...
رحم الله كاتب الكلمات