[أليا صهل]

قصيدة في الاسهم

لا والله اللي تعبنا منك يالشاشه=مخباي خالي وشوفي رايح ٍ فيها
بعض العرب قدمها يامكثر رعاشه=لو يربح اليوم باكر مايثنيها
فكرت أجي تاجر ٍ والناس شواشه=وروحّت لسوق والصلات ناصيها
اسابق الطير في دربة ومغباشه=ابغى النواميس باولها وتاليها
دخلت للبنك اشوف السوق وقراشه=ولقيت احد قدمها واحد ٍ يناديها
صجة ولجة وروس القوم منداشه=والناس تجمع وبعض الخلق لاقيها
من شافهم في التداول قال حشاشه=الشيخ يضحك وابو ددسن يباريها
صار المؤشر يجي ويروح بعراشه=وعزمت اطب البحر والنفس مهفيها
سيارتي بعتها ولحقتها كاشه=وشريت لي شرية ٍ ياشين طاريها
اثر القرادة تدورني وغشاشه=خسرت كل السهوم اللي منقيها
نشبت والحظ راس المال ماناشه=وقول يمكن لعل الله يقديها
ماعاد عندي سوا غترة ودشداشه=افلست منها ولا ادري وش مواريها
لا واحسايف على اللي مابرد جاشه=حاول يعالج عيونه جاك معميها
كم واحد ٍ من سببها مات بفراشه=عجز المداوي عن العلة يداويها
وياليتني يوم شفت الناس منحاشه=انحشت والبورصة مانيب راعيها
سلمت من عالم ٍ للمال قشاشه=والا الهوامير حافظتن دعاويها