جيتك وقلبي هو اللي غصب وداني
جيتك وروحي تبي منك مطالبها
عندك علاجي ولا هو عند احد ثاني
ياللي جروحي من صدودك سبايبها
أبطيت عني وعنك العلم ما جاني
والنفس من هرج العواذل حيل متعبها
مدري تغزلت فيني لأجل تنساني
وإلا أنت روحي على الفرقا تجربها
ما قصر الوقت فيني لا تحداني
دنياي عقبك تولتني مصايبها
شفني من أسباب صدك زادت أحزاني
خلفت فيني جروح من يطيبها
خل التغلي حبيبي لو على شاني
تفداك عين مناها شوف غايبها
محروم جيتك وزاد البعد حرماني
فيك الهقاوي دخليك لا تخيبها
دايم وطاريك بغيابك على لساني
أعد الأيام في بعدك واحسبها
ياما تغنيت فيك بأعذب ألحاني
تنزف جروحي قصايد شوق وأكتبها
مالوم عيني لو أن الدمع يغشاني
صارت تشوف التجافي من حبايبها
ليتك تحس بعذابي والذي جاني
حتى تشوف الظليمة وش عواقبها
تنام مرتاح بالك والله وهاني
وأنا عيوني لذيذ النوم حارمها
فدوه لك عمري وحياتي أخذها
بس دخيل الله نفسي لا تعذبها
|