شمعه
،،
عسى ماشـر ؟
يقولـون السهـر يـرويـك من دمعــه
يقولون انـك البـارح شهقـت بآخـر اكتابــك
عبـس وجـه القمر ليلـة غيابـك .. وانطفــت شمعـه
عسـى ماتهــت فالظلما .. وضاعـت سكة احبابــك
تـزف الجــرح في كفـّـك .. وقلبــك يحتمـل قمعـه
قهـرت بحبـرك الـدفتـر وملـّت روحك عْـتابــك
عسى مالملمـك حزن الطريق ... وشتتـك جَـمعــه
عسى مازارتـك وحشــه .. ودقـّـت ضيقـتــك بابــك
عيـون أطفـال حارتنا .. تراقـبنـا ومستمعـه
وحشها الصدق في عينك .. بـدت تنشـد عن غيابك
وجارتنـا ..تكفكف حزنهـا .. وتجفــف الدمعــه
تمـر لــدارنـا تسـأل : حنينـك ليـه ماجابـك
رحلت .. وطيبـة الشارع تضـج بسيرتـك سـُمعــه
ولا مريتهـــا دارك ولا حنـّيــت لترابـــك
يضم الليل في صدر الشوارع ناس مجتمعـه
كثير احباب قلبك واللي اكثر ناس اصحابك
يذوب الشوق بآخر مابقـى في لهفة الشمعــه
على صوت الحنين ودمعتيــن الروح بكتابــك
كثر هالليل ماذاق الدموع بوجنتـه لمعــه
عبس وجه القمـر وأحيا ضما عينه على أهدابـك