الاخ قلب الاسد
هذا موضوع منقول لشخص يفصل قصة سفرته لتايلاند ويذكر فيها معلومات مهمه عن تايلاند من فنادق ومطاعم ومدن .... الموضوع اكثر من رائع أرجو قرائته :
بدأت رحلتنا بالتحديد يوم 27 يناير ومن بدايتها كانت نكبة مالقينا احد يوصلنا لمطار البحرين,حيث اناا ساكنين بالدمام والله ويعجبك ابو راجح ويوصينا نروح الى سواقين التاكسي في محطة النقل (يعجبك من ناحية الفكرة بس ماعطانا حق الروحة) 120 ريال كاش
والله ونظهر من البيت انا ويا تركي كاشخين وريحة العطر فايحة ويوصلنا سواق تركي
الحمدلله ذاك اليوم مافي زحمة على الجسر تعرفون وقت اختبارات ويوم اثنين , وصلنا لمطار البحرين وانتظرنا حوالي ساعتين لطائرتنا اللي بتروح لبانكوك عن طريق دبي (طبعا وقتها لا اهلي ولا اهل تركي يدرون ان حنا بنسافر لتايلاند بس لو دروا كان قاموا علينا تكفيخ)
طبعا سافرنا على اساس حضورنا لمهرجان دبي(18 يوم في مهرجان دبي!!!!!!) وصلنا لمطار دبي الانيق وماردنا والله الا مطعم سفر , ودقينا في ذاك البوفيه اللي يحبه قلبك وانتظرنا حوالي 5 ساعات وكنها 5 دقايق لطايرتنا اللي بتقلع لبانكوك طبعا تمشينا في السوق الحرة وريحنا شوي في كافي القرية الايرلندية
ونادت القاعة حان وقت مغادرة الرحلة رقم 382 والمتجهة الى بانكوك يرجى من جميع المسافرين التوجه الى ال***** رقم 21 . ونسرع علشان نلحق على الكراسي عسانا نلقى قدام جنب الدريشة ( قرويين مادروا عن البوردنج)
وغادرت الطايرة 5 ساعات ونص الا حنا في مطار بانكوك ونصلي اللي فاتنا من صلوات وننصى(نتجه) الى كاونتر بانكوك ايرويز او طيران بانكوك ونقص تذكرة على اقرب رحلة لجزيرة فوكيت ساعة ونص الا حنا في بانكوك ايرويز اللي طيرانهم جدا نظيف وجديد بالحيل وخذت رحلتنا من بانكوك الى فوكيت ساعة وعشر ووصلنا بحول الله الى جزيرة الاحلام جزيرة فوكيت او لؤلؤة بحر اندامان
ولاحظوا من صارت حادثة محطة النقل بالدمام الى وصولنا الى فوكيت قسم بالله ماطب النوم عيني تقريبا 36 ساعة بس والله حللت النوم في فوكيت
بعد وصولنا لمطار فوكيت خذينا عفشنا وسالنا عن التاكسي ونختار هذيك الكامري البيضاء اللي تلق (تلمع) وتودينا لمنتجع ماريوت الفاخر حيث استقبلونا بطوق الياسمين وعصير عشبة المنثول الباردة وفوطة معطرة حارة , وحقيقة المنتجع كبير وجميل جدا لدرجة ان ماودك تطلع منه ابد
امسينا اول ليلة ومن بكرة ذهبنا الى اشهر شواطئ فوكيت اللي هو شاطئ باتونجpatong حيث السياح (متسدحين) على الشاطئ وتقدر تشاهد جميع انواع الرياضات البحرية ومقابل الشاطئ تلقى المطاعم والمقاهي والمحلات اللي ماتقفل الا الواحدة صباحا تمشينا شوي وتغدينا في مطعم اكلات بحرية seafoodبس توهقنا بالسمكة كبيرة بس طعمها الله يديم النعمة
عقب ما ارتحنا وكلمنا الاهل قلت لازم نبدا الهبال والله واسال عن اكبر فيل في الجزيرة ويودينا راعي التك توك (دباب مغطى بثلاث كفرات) الى سيام سفاري اللي فيها يرقى بك الفيل الى قمة جبل تشوف البحر تحت وانت وسط الغابة فوق طبعا ماركبناه الا بعد شد وجذب وتحريم وطلاق
والله ونركب الفيل ويوصيه مدربه التايلندي مرة يقربنا يم حافة الجبل ومرة يوقف بنا واخرها يقطع بنا الشارع ويسرع فينا الصراحة ما الوم تركي يوم يخاف (ويومنا في القرية التايلندية هبلت به كل ما مد خرطومه بياكل الموزاللي في يدي واسحب يدي, حقد علي وانتفض بجسمه واقمز من الخوف وتركي يضحك)
بعدها رحنا لنادي الرماية ونطلب ذاك الشوزن ويقوم التحدي بيني وبين تركي واصقع كل الطلقات في الدايرة السوداء اما هو بغى يشيل راس المدربة التايلندية(لا امزح كلنا قالت لنا المدربةvery good وكبرت رووسنا )
اليوم الثاني رحنا لمدينة فوكيتphuket town وذهبنا الى القرية التايلندية وصار ماصار يوم اهبل بالفيل وشفنا الملاكمة التايلندية وفاز الملاكم اللي اختاره تركي ودريت بعدين ان الملاكم فيه عرق قصيمي علشان كذا فاز
بعدين رحنا لسباق سيارات الكارت وحدينا واحد شكله بريطاني وعديناه وكسرنا راسه في السباق (يعني فزنا عليه)
اخر شي طلعنا لاعلى هضبة في المدينةlang veiw وتشوفون منظر المدينة من على قمة هضبة هذي مشابهة لقطار الجبل في بينانج بس حنا ركبنا سيارة لان مافي قطار في فوكيت
بعدين رحنا لسوق روبنسون تقضينا ورجعنا للمنتجع
اليوم الثالث نصه قضيناه في النتجع حيث قمنا مبكر يمكن الساعة 7 وطلبنا الفطور وتقهوينا الشاهي في البلكونة المطلة على الحديقة والبحيرة وعينا من الله خير , ثم زهمنا (كلمنا بالتلفون)على النادي الصحي نشوف وش عندهم قال عقب عشر دقايق ستبدأالتمارين المائية الايقاعية water aerobicsفي البركة الشمالية قلت: توكل على الله , قال: انتو اثنين , قلت : الله الله.
خذينا الفوط ومغطنا (ذهبنا بسرعة)للبركة ولاننا في الصبح ماجا من المنتجع الا حنا للتمارين ويبدأ المدرب التايلندي ويشغل المسجل ونسوي التمارين مثله من شافنا قال مهابيل وفي احد التمارين تركي يمسك يمناي والمدرب يمسك يدي اليسار ويخلينا ندور, سوينا التمرين لتركي ثم قلت له باسوي انا ويا تركي ذا التمرين لك واكلم تركي بالعربي عشان مايفهم واتفقنا نعد لثلاثة ثم نغرقه وفعلا غرقناه وماصاد خير , من بكره شفناه يعاطس.
بعد احداث البركة على طول اتجهنا للنادي الصحي حيث الساونا والجاكوزي وطولنا فيه وزانت السوالف على مخ مدربنا التايلندي ماطلعنا الا يوم اقبل الامريكي وقلنا بلاش امراض وفعلا (نفذنا بجلودنا ) يعني هربنا من الساونا بعدها خذينا جيم تنس ريشة لين ماحسينا بالجوع رحنا المطعم البحري في المنتجع ويوم جاب الفاتورة قلت على الحساب ( وعدك اذا بتسوي chek out) بعدها رحنا لشاطئ باتونجpatong beach
ثم ذهبنا لمنطقة باني كاب اللي فيها اجمل منطقة غروب في العالم وفعلا انصدمنا بعد ماشفنا زحمة السياح خصوصا من الاجانب والمنظر فعلا كان رائع , بعدها رحنا لمكتب سياحي في كارون بيتش علشان نحجز مقعدين لعرض فوكيت فانتاسي اللي تعتبر افضل مكان سياحي ترفيهي ليلي حسب تصنيف هيئة السياحة التايلندية , وصلنا فوكيت فانتاسي الساعة 8 المساء تمشينا في المحلات والالعاب وشفنا العروض البهلوانية المصاحبة لانغام الموسيقى التايلندية في الساعة 9 ونص اعلنوا عن العرض ورحنا وانصدمنا بالزحمة الكبيرة عند المسرح الخاص وقبل ماندخله اخذوا كل ادوات التصوير ودخلنا المسرح اللي كان ممتلئ عن بكرة ابيه (4000 كرسي) وتواصل العرض ساعة ونص وفعلا كان العرض خيالي ويعتمد على عامل الابهار من ناحية المؤثرات الصوتية و مشاركة الافيال والطيور و استعراض الممثلين في الهواء وكان هذا العرض يحكي عن قصة فوكيت
وبعد ماطلعنا خذينا الكاميرات وصورنا مع الممثلين ثم رجعنا للمنتجع وحطينا رووسنا(يعني رقدنا)
اليوم الرابع والاخير قضيناه كله في المنتجع حيث بدينا بالسباحة ثم النادي الصحي ثم الجولة بين الحدائق الى ما استوقفنا نادي الاطفال هو فعلا للاطفال لكنه يحتوي على بلياردو وتنس طاولة وانترنت وشاشة كبيرة لعرض الافلام وتقابلنا مع الاطفال الكوريين وهم جو و شي اوو و الولد المتين(سميناه البطريق) واصغرهم واحد دب خش عرض مع تركي وصاروا اصدقاء
المهم تعشينا في كوتشينا المطعم الايطالي (ايضا الفاتورة على الحساب)
من بكرة صكونا ب 150 دولار وارتحت لاني توقعتها اكثر
وناخذ تاكسي لمطار فوكيت عشان الاقلاع الى بانكوك الساعة 1 وربع
يتبع
|