الجــــرح
ماهو خاطـر شـوي ويـروق
(الجـرح حتـى لـو تشافـى يعلـلـك)
واذاك متحمـس متاهـات وطــروق
انـا تعبـت اشـد حيلـي واحـاولـك
سماي ما شيّ شمس ورعود وبـروق
والريـح ماهبـت ولايجـري الفـلـك
والقــلـب
ناشف بحر وشقوقـه شقـوق
وشلـون؟! بيكـوّن سحـاب ويبلـلـك ؟؟!
يا ضامي انا الضما ومتشبـع حـروق
واذاك ضامي للمواصـل .. انـا هلـك
هــلك
ووقف في وجهي الاصل والـذوق
والمجتمـع والعـرف والفقـر واهلـك
متعومـس (وحـزن النبـلاء مرمـوق )
يعني لو احتاج الـك ماجيتـك اسألـك
اللـي علـي
اشكـي واعاتبـك برفـوق
واقـولـك ودي مـاعـاد اتـأمـلـك
مـن دورة الايـام ياخـوك مخـنـوق
الوقت مشانـي مـن السلـك للسلـك
ازل خطوه .. بـس؟؟مـا ازل منطـوق
ولو صارت؟؟ ابحـب خشمـك واجاملـك
يبقـى البنـي ادم مجـرد ومخـلـوق
ملك .. ولكن في الحقيقـه بـلا ملـك
كـــــذاب..
قايـل كـل مطـرود ملحـوق
سنين وانا اطردك وازريت لا اوصلك
كنك تطيـش وكنـي ادور فـي طـوق
كل ما وصلت اخـرك يطلعلـي اولـك
ليت مافي خاطـري شـوق وحـروق
ماكان حسيت ان انا بـس مـن كلـك
الشــــوق
ماهو رعشه وقبضـة عـروق
وماهو اللي من شينك فعينـك يجملـك
وماهو شعور ياخالق الـروح برفـوق
وماهو سحر ولا ادري والله شقول الك
انا سحابـة حلـم وتطيـر بـك فـوق
وتطـيـر ولا ودك انـهـا تنـزلـك
الشوق هذا ..
والا انـــا شوقـي البـوق
ماقد حصل في شــوق هـذي ولا تلـك
تدري وش اسوي ليا اضناني الشوق؟؟
اسـوي بعيونـي كــذا واتخيـلـك
واقـربـك
واتــــوق
واتــــوق واتـــوق
واكثـرك واحلـف مـاعـاد اقلـلـك
واصورك في الموق وتكبر على الموق
(وتطيـح مـع دمعـي علـى ايــدي واقبلك)
هذا غــلاي اللـي مـع الـدم مدقـوق
ولا عاد تسأل عن شعـوري وازعلـك
محبة ماهيـب مـن طـارف السـوق
لو انـك توكـل.. كـان والله لاكلـك
جيتك حقوق ورحت ماعنـدي حقـوق
وان قلت ما احبـك ؟! ابجحـد مواصلـك
احـبـك .. الا يا بـري حالـي وعـوق
(من كثر ما احبك اخـاف انـي اقتلـك !؟؟)