لا تذرفين الدمع يا عين تكفين
من لا يقدّر دمعتك وش تبيبه
خليه في شانه ولا عاد تبكين
وش الفايده غير العمى تبتليبه
ياعين دمعك مايرد المقفين
والجرح مايبرى بليا طبيبه
صبرك و لو عدى على صبرك سنين
واللي بلاك بهمٍ ربي حسيبه
دام الوفا يا عين ماله مراعين
ياما حبيبٍ خان عشرت حبيبه
دار الزمان وراح من له تودين
وعيا زماني يا عيوني يجيبه
ولو تسهرين الليل ياعين عامين
ماحد ياخذ غير حظه و نصيبه