[السوق مولع]

اخواني واخواتي..

السلام عليكم ورحمة الله وبركاتة .

خلال ايام العيد وامام السيرك في حي المروج عبينا استمارة مسابقة وبدون شروط أو اسئلة في الاستمارة وكانت تلك المسابقة لأحدى الشركات السياحية وتدعى العطلات الوطنية وكتبنا ارقامنا وذهبنا في طريقنا ...

بالأمس اتصلو علي شركة العطلات الوطنية وقالو لي الف الف الف مبروك انت فزت بجائزة انت والأسرة وتفضل لزيارتنا لتستلم الجائزة وهي عبارة عن ليالي مجانية في مكه المكرمة وقرية النخيل بالدمام .

المهم انا ذهبت ولم احضر العائلة واتصلت بهم وانا في الطريق لتحديد موقع الشركة بالضبط وأول سؤال سألني اياه الموظف قال لي المدام معاك ( وكان مهتم ) قلت له المدام تعبانة وما تقدر تجي البركه فيمن حضر ............ . تنرفز قليلا" وقال الشروط والنظام لأستلام الجائزة هو حضور المدام قلت له مانبي نثقل عليكم انا لحالي يكفي قال بس نظام الشركة يلزم حضور المدام ............... انا تنرفزت قلت له انتو بتوزعون جوائز ولا تبون حريمنا يترززون قدامكم ( عيب هالكلام يا أخي العزيز ) استحى الموظف وقال خلاص انا بمشيها عشانك طال عمرك ...... قلت له هذا كلام الرجال .

حضرت واستقبلني واحد قافلة معه شكله .......... لأني ماجبت المدام وقام يطرحلي محاضرة وعروض وخذ من هالرخيص ويطيرك الى 5 نجوم ويسبحك ويرقصك ويمشيك ويخليك ما تتكلم ولا يعطيك فرصة حتى تسأل الا بشق الأنفس ... ( اسلوبهم الحقير طبعا" ) ويقولك نبي منك 6250 ريال قيمة العرض مقابل السياحة والسكن .

المهم يا اخوان العرض مغري بس لما قلت له عطني العرض وبشاور نفسي في البيت وبرجع لك بكره زعل وقال اخر يوم هو اليوم يا تدفع يا تروح عليك الفرصة وانت فكر في هالدقايق قلت له ما اقدر الا اني اقولك ارد لك خبر بكرة قال لا ومصر على ذلك وقال ان اليوم اخر يوم للعرض قلت له شكرا" وخل عرضك لك حتى مهلة ماتبي تعطينا قام والله وقال فرصة سعيدة بعد ما حس انه مافية كاش في هاللحظة وتركني ....................
عرفت ساعتها ان الغش اتضح امام عيني............... يعني بالفم المليان اذا الفريسة سهله وحسيت انه بيدفع ومعاه فلوس ومصفوق في نفس الوقت ركز علية وانتبه يطير ....... وان كان الفريسة طلع ذيب ومفتح عيونة وشكلة بيمرمطك خلاص قم وخله وقله مع السلامة ..


نرجو ممن مر بمثل تلك الحالة افادتنا هل كلامي صحيح ام ان الشركة ممتازة وصادقة