[تداول]

يقول بوش وانتم بكرامه ان كلمته اللي زيّ وجهه " تمثل أفضل أمل للشعب

الفلسطيني وأفضل آمال طويلة المدى لإسرائيل وانه ضايق صدره

ومتغلق ومنتك لأنه يشوف ان اسرائيل مهيب متهنية ولاهمب سالمين الا الين يحطون دولة فلسطينية

ويقول بعد كانكم تبون معاد تهاوشون وتصالحون فطيعوني

و أما اللي يحتسي باسم البيت الابيض فيقول ان الأمر يرجع للطرفين في رعاية وانبات البذور اللي غرسها

بوش " مهوب عاقل ذا اللي مقطّـع ٍ الفلاحه وليت من يجيبه بدال صعيدي مزرعتنا اللي يبي يروح عشان يروس فيها و يلقح النخل ويصرمه

هالوجيه وجيه رئاسه !! ،

ومن جهة ثانية قال المملوح باول والله ان ماودنا نكرش عرفات ونقول له اقلب وجهك عن الرئاسه بس عاد وش نسوي

عطيناه وجه أكثر من اللازم وقلنا له كم مرّة يالحبيب ياللبيب خلوا " الارهاب " عنكم بس ماحولك أحد

وقال ان امريكا ودها ان الفلسطينيين ماينتخبون عرفات ثانيه لأنه مبغثر ٍ كبودهم ومحوّمها ،

وانهم يبي يحترمون نتايج الانتخابات ان جت مضبوطه ولا جاء فيها لعب ولا خاش خرفاش ،

وارسلنا مراسلنا أبو يزيد الكربه عشان يشوف لنا ردود الفعل على هالكلمه :

ـ هاه وش ردود الفعل الي جت ؟

ـ أتت ردود الفعل متباينه بين مؤيد ٍ ومعارض ( أقول احتس زي الاوادم ولاتفلسف والا كرشانك )

ـ طيّب .. جت ردود الفعل مختلفه وأول رد فعل جاء من عرفات بكبره وماامدا بوش يسكت الا وهو حاتسي وقال

ان هالخطاب : "محاولة جدية لدفع عملية السلام إلى الأمام" ( الله يخلف .. يبي يكرشونك يالثور وانت تقول دفع لعملية السلام )

واما صايب عريقات فقال ان عرفات هو رئيسنا وحنا اللي مختارينه ووش على أمريكا منّا

وأحمد قريع رئيس المجلس التشريعي الفلسطيني انتقد تأييد عرفات للخطاب وقال

ان الشعب الفلسطيني ماجاز له خطاب بوش

لأنه غامض ولا قضّبنا علم ولا ندري وش يبي ، شكله يبي ريال

وان حنا نبي نسوي انتخابات ولازم توافق أمريكا على نتايجها كانها صادزه انها ديمقراطيه

وان حنا نبي من بوش حلول سنعه مهوب نصايح غيّروا فلان وبدّلوا علاّن ولو نبي نغيّر غيّرنا ولا شاورناه

ومن طرف حسني مبارك فهو جايز ٍ له الخطاب ويقول بيّض الله وجه بوش وغريبه ان فيه ناس ماجاز لهم

وأنا ما اشوف ان في الخطاب شرط لتغيير عرفات " البس نظارات الله يحييك "

وأما راعي الاردن فجاز له الخطاب بعد وقال ماقصر بوش واننا مستعدين نفزع مع أمريكا عشان ننهي النزاع العربي الاسرائيلي " اصلاً من شفتك عليك بدله وصاقع ٍ بنت البكار وانا غاسل يديني "

وأما كوفي عنان فهو مدح خطاب عرفات وقال انه سنع ( من شاورك أصلاً ) وقال بس ان عرفات قائد شرعي ( دارين انه مهوب قائد لاقينه عند مسجد ) :)

منقول نقلاً تأديبياً