الناس لو حاولت تكسـب رضاهـم ****لا أرضيت واحد زعل منك عشرين
امـا تجاملهـم وتتبـع هـواهـم **** والا تجنبهـم يقولـون مسكـيـن
هذا وأنا مالـي مقاصـد وراهـم **** مهما سمعت وشفت بمجرد العيـن
مالـي ورا عقالهـم واسفهـاهـم **** لعلهـم منـي يكونـون راضيـن
واقـدّر الوافيـن وادمـح خطاهـ **** موابعد محاضيبي عن المنطق الشين
واطلب عسى رب العبـاد يهداهـم **** واسعى لهم بالصلح لاشفت مخطين
والناس قـدر اعقولهـم مستواهـم **** وعند العوارف ماتميـل الموازيـن
عند الرجـال اللـي بعيـدٍ مداهـم ****يمشون مع سلم العـرب والقوانيـن
نقل النقيلـي مـا يكـدر صفاهـم **** أهل العقول بكـل حالـه حكيميـن
يردهـم عـن كـل زلـه حياهـم **** خوفٍ على السعمه ولاهـم غبييـن
الله علـى طيـب المكـارم قداهـم **** في منهج الدنيا وفي منهـج الديـن
تبين اشارات الوفـاء مـن نباهـم **** قواعد الشيمـه عليهـا حريصيـن
كرام السبال اللـي يـذري ذارهـم **** لعلهـم دايـم علـى العـز حييـن
اذكر مكارمهم ولا أنكـر جزاهـم **** لو كان عن مدح الحويفـي غنييـن
أهل الوفاء والطيب يذكـر ثناهـم **** واضعاف الأنفس مالهم بالفخر شين
والناس يعرف طيبهم مـن رداهـم **** للشمس نـور وللحقايـق براهيـن
والله خلقهـم مـن تـراب وبناهـم **** وخلق لهم من كل الأنواع زوجيـن
وارزاقهم من عند خالـق سماهـم **** فقيرهم واللـي رصيـده ملاييـن
الدايـم الله والفـنـاء منتهـاهـم **** وكلٍ وما حصل من الشين والزيـن
عالـم سرايرهـم وعالـم خفاهـم **** يحكم ولا تحكم عليـه السلاطيـن
شكّـل طبايعهـم ونـوّع لغـاهـم **** وانشأ لهم فوق البسيطـة عناويـن
ومن فيض جوده وامتنانه عطاهـم **** وسخر لهم صم الصخر والحياوين
لاهو بحاجتهـم ولا فـي رجاهـم **** وعنده حساب المهتدي والمضليـن
بلغّهـم احكامـه بهـدي انبياهـم **** المهتدي واللي عن الحق عاصيـن
ربٍ ليـا نـادوه يسمـع نـادهـم **** الواحد الفرد الصمد منـزل الديـن
ويعلم تواضعهـم ويعلـم قساهـم **** واللي على هدي النبـي مستقيميـن
وعصاة خلق الله جهلهـم عماهـم **** اعقولهم تلعـب عليهـا الشياطيـن
ينسون خوف الله وهـو مانساهـم **** رب الفلق منزل تبـارك وياسيـن
ندعـي لهـم بهدايـة الله عساهـم **** يهديهم اللي كوّن آدم مـن الطيـن
اللي لمرضاتـه رسولـه دعاهـم **** وصلوا على الهادي شفيع المصلين
للشاعر- بــدر الـحـويـفــي