[صعفق الفايز]

انا يجاذبني على البر ثنتين
جمع الحطب ومعامل الشاذليَّة
إليا حذفت الغمر من فوق غمرين
وشبيت ناري والليالي مديَّه
وراكيت صفر ٍ فال شماتهن شين
فنجالهن ما سيق لاهل الرديَّه
وعلى سناها سقت كيف العريبين
اسوق فنجالي لزبن الونيَّه
في خايع ٍ منوة طليق الحجاجين
ما دوجوه اهل الدبش والرعيَّّه
ولا وطوه مجهجلين الوراعين
اللي لهم في صيدة الضب نيَّه
قفر ٍ خلا وسمه تقافى نهارين
سيِّل دعوبه مزنة ٍ عقربيَّه
فيه ام سالم تستلذ التلاحين
طير الربيع يجاوب الراعبيَّه
بارض ٍ نوايع عشبها يبهج العين
مدة كريم ٍ وافي ٍ بالعطيَّه
مع رفقة ٍ ربع ٍ كرام ٍ ميامين
كل ٍ يبدِّي للكرامه خويَّه
مع رفقة ٍ فيهم رجوح الموازين
في سلمهم ما فيه هاذي وذيَّه
ناخذ من علوم الرجال النقيين
اهل العلوم الطيبات النقيَّه
سوالف ٍ صارت لاهلها نياشين
راحو وجزلات السواليف حيَّه
ناخذ مدى صولاتهم بالميادين
في سجِّة ٍ بين السمي وسميِّه
سجّة زمان ولذة العمر يا حسين
لا سقت رجلي بالديار العذيَّه