منتديات تداول - المحلل .... ابوعزيز

أعلن مسؤول ألماني انه تصامخ قبل شويّ طيّارتين المانيات في الجوّ " وش ظنك أجل يبي يتصامخن في البحر .. الله من زين المسؤول
" وقال ان فيه خساير واجد
بس يقول الى هالحين ماندري كم هي .. ويقول ماندري بعد الى هالحين
هل الطيارتين حقات شحن والا نقل ركاب " بالله وش تدري عنه أجل "
ويااارب انها الطيارة اللي فيها منتخب المانيا اخخخخخ " عشان معاد يتعودونها ويخفسونّا ثانيه "
ويقول مراسلنا ان الطيارتين وحده منهن بوينج والاخرى توبوليف والمراد ان الطيارتين يوم تصادمن سلفطن حول مغَدر مدري بحيره اسمها كونستانس بين الحدود الالمانية والسويسرية ، وأكيد الا طلعت التقارير مهمب معترفين ان السواقين عليمية و يبي يملطونها في الجو كالعادة ويقولون
ان السبب هو رداءة الاحوال الجوّية .. والله يعين هالالمان مايدرون وين يلقونها منه
من خبقتهم في كاس العالم والا من هالطيارات اللي طاحن

هذا اللي عندنا والا جانا زود أخبار علمناكم والا المارية الغفله .

ودام ان هالالمان مايدرون وش سبب تصادم الطيارات نبي ننشد محللنا السياسي أبو عزيّز عن السبب
هاه يابو عزّيز وش ظنك السبب :
أبو عزيّز : مايبي لها حتسي واضحة ٍ وضوح الصفارى في الاثله الحاتّـه السبب هو هتلر هو ونازيته وسياسته التعسفيه اللي يتّبعها .
أقول هتلر فاطس ٍ من سنة جدي في أمان الله بس والشرهه على اللي يستضيفك .

منقول نقلاً تأديبياً