يالكهرب فك وافك ولا الوعد عقب العطله اوريك

[فتى سدير]

بسم الله الرحمن الرحيم

مسيكم بالخير لاني الحين المغرب وصبحكم بالخير اذا قريتو الصبح وعلى العموم طبعا يا اخوان محد ينكر ان الكهرب الحين هو ملك السوق وهو اللي لاعب بحسبتنا وهو اللي مهبل بالعالم واخوكم في الله صاير مثل خويا الامراء امشى ورا الكهرب ونا ساكت وعاظ على شحم وخايف يجي يوم يزعل على ويحوس مريري .

المهم ما اطول عليكم يالربع انا ترى مهنا ذيك الخبره بالسوق بس بصفه عامه انا ذكي ما على ( رقع يا مرقع ) واقولكم الكهرب بعد فورته الاخيره ولله الحمد دلعناه وقلنا له سم طال عمرك بس انت امر وحنا نطامر وشكله ما قصر ابن الحلال صاد عنا كل هالمده وحنا عم انأطش ( كلمه لبنانيه ) وراه وهو غافل عنا وما اطول عليكم يالربع اخوكم لشط له كميه مهيب بسيطه قبل اربع ايام تقريبا بسعر 83 وعلى طول عرضت ب 84 لكن الكهرب شكله التفت لي وبدا يدحدر الين اشوفه وصل اليوم اضن سعر 80 وتعرفون الاجازه جت تقريبا فسؤالي لاهل الخبره ولا يهونون الباقين وش الراي ووش الدبره هل انتظر ولا ابيع بخساره ولا وش السوات وترا اخوكم قنوع بس يكره الخساره مهوب حب بالفلوس لا بس لاني احب اذا دخلت مجال ابدع في ( اي هين ) .

على العموم اخواني لا تبخلون بنصايحكم ووش المتوقع يصير بالاجازه ؟؟؟

منتظركم على نار

فتى سدير الهامور

[مستفيد]

اخي الكريم ماحدث اليوم عملية جني ارباح طبيعية جدا زاد من حدوثها ما تفعله المنتديات الاخرى من توصيات لاهدافهم الشخصية واهداف الهوامير الذين يتعاملون معهم لتحقيق عمليات الشراء بسعر نازل

لا تقلق من هذا التصحيح ولا تنسى اننا على مشارف نتائج الربع الثاني القوية لمعظم الشركات التي ستصعد بالمؤشر الى ارقام جديدة

هذا وبالله التوفيق (الجميع احرار في تصرفاتهم )

[فتى سدير]

اخوي مستفيد مشكور يالغالي على ردك اللي تقريبا فهمت نصه وهو يوحي ويعطي انطباع يريحينى .

اخوي مستفيد ما فهمت وش قصدك بجني ارباح ودي تفصل فيها تفصيل ممل ( وعندي غير ممل ) وتوضح اكثر وكم توقع يوصل السعر وكم المده اللي تنصحني انتضر فيها ووش وضع الكهرب يعني ودي تسولف الى بكره حول الكهرب تراها هي اللي الناس حولها وتسأل عنها لا حرمك الله الاجر يالغالي وما قصرت على كلامك اللي طمني .

[مستفيد]

عملية جني الارباح هي بالمختصر عند قيام الهوامير بالشراء بسعر منخفض يقومون عند ارتفاع السعر بالبيع وتحقيق مكاسب للمعاودة مرة اخرى للشراء بالسعر الاول او السعر النازل وهذة عملية جدا طبيعية لا تدعو للقلق ويجب علينا جميعا مهما كانت كميات الاسهم لدينا ان نمشي مع التيار ونطبق حركات المكسب الذكية